Lisa S.囡不離身Ana R.被迫做反派
名模Lisa S.和Ana R.最近合作做童裝生意，互稱是完美拍檔，從未鬧交。相識了17年、同居4年的兩人，關係更已超越閨蜜，儼如「老夫老妻」。Lisa大爆Ana初為人母時，經常半夜致電請教湊女問題，她說：「我同佢講依家冇人死，叫佢唔使咁緊張。我哋關係合拍到好似老公、老婆咁，記得品牌記者會前一晚我好緊張，打畀Ana向電話筒大聲尖叫，佢好明白我尖叫唔係向佢發脾氣，而只係發洩情緒。」
吳彥祖硬不起來
Lisa指與Ana甚為合拍，但反而與老公吳彥祖的教女方法不太夾。她更自認是輕度「直升機家長」：「有時帶囡囡去公園玩，我一定唔玩電話，會全神貫注睇實佢。有小朋友之前我以為自己會係個Fun Mom，Daniel（吳彥祖）係個嚴父，但事實啱啱相反，老公有時想強硬啲對個女，但個女一嗲佢，佢就即刻軟晒。」
而Ana亦稱自己老公對女兒總是言聽計從，令她被迫做反派。Lisa一家移居美國，Ana表示可能5年後亦會考慮移民。提到兩人的童裝品牌Spicy Lil' Tofu，Lisa稱不時有人潑冷水，指她們一定蝕錢，但Lisa一於忠於自己的夢想和熱情，希望５年內可做到收支平衡。
文：名人組