迪子仆崩牙流口水撲10萬救齒
歌手迪子於10月底到韓國旅遊時不慎跌倒，仆到牙齒飛脫，嘴部要縫23針。迪子昨日露面時，直言除了擔心毁容外，亦為10萬元的整牙費感苦惱，又疑患有創傷後遺症，一次無妄之災，令她身心受創！
傷後的迪子明顯消瘦，昨日受傷後首度公開露面時面部略為浮腫，即使化了妝仍難掩憔悴，她大嘆黑仔：「尋晚瞓瞓吓，成個窗簾跌咗落嚟，差啲又撼到。」問到現時傷勢，她展示右邊手臂已結焦的傷口，並說：「其實左眼縫咗兩針，不過已經消咗腫，依家最大問題係啲牙。」記者見她兩隻門牙有點歪，門牙旁缺了一隻牙，另一邊則崩剩一半，上顎戴上鋼線牙箍，迪子坦言為「整牙費」傷神：「我問過牙醫，杜牙根、種牙同套牙，埋單要成10萬，對我嚟講真係好貴，希望可以搵到贊助啦！」
戴鋼箍定形
除了為「撲水」整牙苦惱，迪子亦面對心理創傷：「我唔會話唔敢去韓國，不過唔會再去嗰間餐廳囉，同埋嗰間餐廳有工業大廈Feel，都唔敢再去呢啲地方，仲有依家出街見好多人逼埋嚟都會驚！（身體上有冇不適？）韓國嘅醫生幫我整番對門牙後，我發覺兩隻牙比以前長咗。因為戴咗牙箍，有時合唔埋個口會流口水，覺得縫咗針嘅傷口位滑咗，唱歌開聲時有啲音發唔到。」
「就算整容都唔靚」
迪子透露現時已戒食肉，只食海鮮及蔬菜，強調最驚毀容：「醫生同我講個嘴有機會唔可以回復原貌，可能會歪或者好似兔唇咁，就算整容都唔會整得靚。雖然我冇宗教信仰，但都祈禱求個天保佑我唔好毁容。」她表示當日母親看到報道時，傷心得大哭大叫，幸而弟弟幫忙安慰。雖然帶傷在身，但她表示唱歌工作盡量如常。
文：音樂組