柏豪鼻哥窿曉做戲吹得佢脹？！

由成名作《六天》，唱出兵仔心聲，到發揮詩興，盡顯大文豪本色，再到同亦敵亦友嘅余文樂組成橫洲工業轉身射個三分波，就知柏豪幾咁「也文也武」，天降如此神人到娛圈，就似隊波多咗美斯同C朗，救國救民呀！不過，呢啲都係網民話，明褒暗諷！

攞完金獎 黑氣纏身

上天可能知道柏豪嘅好，派幸運之神落凡間，未到Level就頒個男歌手金獎畀佢，不過天神就真係大整蠱，講真將一個地位崇高嘅歌手金獎，頒畀一個依家叫你用十秒，都未必數到佢五首歌嘅歌手，擺明玩佢啦！Nuts哥幾時都講人有三衰六旺，月有陰晴圓缺，但估唔到柏豪愈紅就愈見鬼，攞完呢個金獎，黑氣纏身，網民對佢咬住唔放，無論代言M巾，到狂迷瘋狂示愛，再到吳哥窟參加10公里賽，扮跑馬拉松事件，都為網民帶來無限恥笑聲，So Sad！

柏豪有樣又有肌肉，迷倒不少女士。

在《使徒行者2》中，柏豪被指鼻哥窿都識做戲。

依家做偶像派唔同咸豐年玩法，唔需要純純兔做偽處男、處女，柏豪識得置諸死地而後生，死咗翻生娶美人，做人夫咩玩法？咪就係Sell真誠真心囉，人逢喜事精神爽，柏豪簽約TVB，人生走上真正高峰。

Nuts哥好少做預測，不過柏豪如今氣勢如虹，歌、影、視三線齊發，Demand大過Supply，柏豪囊括最受歡迎男歌星同埋視帝指日可待，呢個高度連當年古天樂、林峯、黃宗澤都做唔到，時也命也，時勢造柏豪，蛇咬都唔信有咩可以阻到佢。

仲有個最主主主要因素，柏豪結咗婚，鎮得住網民！佢喺劇集《使徒行者2》取代林峯，先唔講佢演成點，但佢每次出場，網民就Focus咗去佢個鼻哥窿度，冇辦法，真係好搶戲，網民仲咁講：「柏豪個鼻又大又圓，強而有力嘅圓形。依家嘅柏豪，好似比比鳥同圓形插座嘅混合體，真係連鼻哥窿都有戲！」啲網民仲好有心，幫柏豪《使徒行者2》主題曲《天網》整咗個鼻窿無限loop版，叫《鼻窿行者》添！

至高境界 自我解嘲

睇落好似笑緊佢，但柏豪已經進化到可以四両撥千斤，化恥笑為讚美，隨意聳聳肩話：「多謝我嘅鼻哥窿，係父母送畀我嘅禮物，希望網民都鍾意自己嘅器官，好少有器官可以脹大縮細。」答得咁得體又連消帶打，你又點吹得佢脹。問題係柏豪每當高峰時，總會躺着也中槍，最近佢部靚車泊街，都會畀人話阻住地球轉，阻住旅遊巴轉彎，又立即惹嚟萬千網民「招呼」，你都咪話唔邪！

Nuts哥