何基佑靠數據搵出湊仔方程式
大隻型男何基佑可算「百足藝人」，除了做主持、歌曲監製外，最近還當上電視節目監製，炮製親子真人騷節目。本身是育兒導師的他，在節目中傾囊相授育兒心得，並透過實例來解決不少父母心底裏的疑難。
何基佑（Kay）最近擔任電視節目監製，為ViuTV拍攝親子真人騷節目《超級奶爸》。2011年他與模特兒鍾凱瑩結婚，於2015年當上爸爸，育有兒子何清義。一家三口早前在學校Playgroup玩耍，雖然囝囝只得兩歲，但表現有禮貌兼樂意跟別人分享物品，相當懂事，Kay教導小朋友確有一手。
針對小孩不當行為
本身是「家長及幼兒教育課程」導師的Kay，今次在節目中走訪多個家庭，針對不同小孩的不當行為「對症下藥」，協助家長化解一切育兒疑難。他稱：「呢個節目一定要將最有效嘅方法呈現，唔會搞完一輪大龍鳳而家長係用唔番。我哋啲方法全部係有實證、經過長時間貼身追蹤接近200個家庭研究出嚟，有數據證明好有效。」
設囝囝食飯時限
節目請來了不少星級父母，例如林子聰、歐倩怡及蔣怡等，分享湊仔心得。Kay表示：「每一個爸爸媽媽，都有佢哋嘅特點。林子聰會希望囝囝有一個快樂童年，平凡是福。歐倩怡就最硬淨，執行力好強，唔會係軟皮蛇。蔣怡因為係『藍帶廚』，喺小朋友食嘢方面會非常嚴謹，會採用一啲好有益嘅食材。而佢嘅教學方法亦同我好貼近，好似若果遇到小朋友唔食嘢，我哋都係會到一定嘅時限就會收晒啲嘢，唔會畀佢哋拖住食，呢樣嘢我哋好相似。
場地：LUDUS Kindergarten-nursery