貪靚Model豁出去 張可義備戰MMA胸骨移位險癱
模特兒張可義曾因貪靚，考慮婉拒ViuTV節目《G-1格鬥會II》的邀約，最終為突破自我而豁出去。惟毫無MMA底子的她，在受訓過程已打到成身傷，更出現胸骨移位等情況，有機會引致頸椎受傷，甚至癱瘓！姨媽更喊住叫她不要再打。
去年播出的ViuTV節目《G-1格鬥會》大受歡迎，今年添食拍第二季，張可義（Emily）亦有份參加兼首度挑戰MMA，談到參加節目的原因，她說：「其實我之前好抗拒參加《G-1》，見到上季參賽者傷晒好恐怖，自己好貪靚，但我打咗兩年幾泰拳，生活一直好乏味，想做啲嘢突破，最終一時衝動而決定參與節目。」
媽媽放心力撐
本身有泰拳底子的Emily，直言MMA難度更高，因為糅合多種格鬥技術，加上其身形瘦削較輸蝕，故需加強訓練，惟她在備戰期間不慎受傷：「當時我做前滾翻嘅動作時唔小心發錯力，嗰刻條頸郁唔到好驚，事後睇醫生先知胸骨移位，頸部嘅軟組織受損，再打落去可能會癱瘓。（屋企人有冇叫你唔好打MMA？）我細佬一直叮囑我小心啲，姨媽喊住叫我唔好再打，反而媽咪好放心，所以我冇放棄，寧願喺台上輸，都好過未打就放棄。」
講到參賽者之一蔡嘉燕聲稱對手拳拳打眼，Emily慶幸遇到只會以技術擊倒人的好對手，故不擔心被打到「毀容」。首場比賽獲勝的Emily可繼續參賽，問到有沒有信心贏總冠軍？她說：「我只希望贏多一場比賽，想再打得激烈啲、精彩啲畀觀眾睇。」
文：專案組
攝：司徒國榮
場地：Atma fitness center
服裝：Yokkao Hong Kong