被問婚期 擺師妹上枱 祖兒爆泳兒最快嫁得出

祖兒昨日穿上超低V裙，出席英皇珠寶L'Atelier Cindy Yeung高級珠寶系列首飾展，並佩戴價值逾500萬的藍寶石首飾。她表示已做足防走光措施，但仍不敢亂動及大聲說話，以免裙子移位。問到會否購買首飾孝敬母親？她指母親甚少佩戴如此隆重的首飾，記者笑指容媽媽嫁女時可以佩戴，她說：「咁娶新抱或者大壽都可以，暫時未諗到咁多。」

叫阿媽唔好再買樓

祖兒透露喜歡鬱金香，希望品牌可推出鬱金香形首飾，記者提議她親自設計首飾作出嫁之用，她稱：「鬱金香唔係結婚嘅花，結婚話題你都係搵番我公司旗下藝人答，佢哋快過我。（邊個快？）哈哈！『筲箕兒』又出場，不過冇人叫我唔好講，佢哋『暗瓦底』都鍾意聽我講。（邊個大機會結婚？）泳兒，係我自己諗，純粹個人睇法。（唔睇好自己？）唔好講我。」

提到祖兒經理人霍汶希（Mani）以7,000萬買入山頂豪宅，她表示不知情：「見到佢會恭喜佢，佢真係好辛苦，畀啲獎勵家人同自己。（你幾時買樓獎勵自己？）好多喇，而且又未有一個心儀目標，想盡快供晒佢。（有幾多層樓要供？）唔知，係媽咪搞，我負責賺錢，不過我都叫媽咪唔好買住，搞掂晒手頭上嘅先。（Mani話有叫老闆楊受成幫手籌首期？）楊生實幫，我哋都一齊搵楊生幫手，發起叫楊生幫手大行動，希望楊生畀條熱線我哋，當係員工福利。」

泳兒與髮型師男友感情穩定，被祖兒踢爆好事近。

楊諾思（中）與模特兒示範首飾。

楊諾思爆胞弟又做老竇

另外，今次珠寶系列由英皇鐘錶珠寶主席兼行政總裁楊諾思（Cindy）設計及命名，她表示感覺似BB出世：「其實十幾年嚟我都有畀靈感啲設計師去創作，年幾前開始籌備用自己個名，係整個團隊成果，呢段時間大家都好辛苦。」Cindy計劃推出親子系列，並大爆胞弟楊其龍再榮升老竇：「我設計嘅時候諗起細佬、弟婦同佢哋就快出世嘅BB。（弟婦幾時預產期？）12月。」

文：名人組