歐陽震華幫拖圍攻 田蕊妮咀吳業坤驚要切腹
視后田蕊妮（阿田）與吳業坤（坤坤）因拍劇成為好友，但前晚卻「夾埋」劇中老公歐陽震華玩殘他！阿田大爆每日開工被坤坤調戲，又點名叫她代霸位兼買凍飲，直言受不了與他拍咀戲：「擔心到時會切腹自殺！」
田蕊妮、歐陽震華（Bobby）、吳業坤、龔嘉欣、江嘉敏、江美儀等前晚出席無綫台慶劇《誇世代》首播飯局，席間繼續拿坤坤拜狐仙的傳聞開玩笑，阿田更與坤坤重演當年與陳展鵬拍攝亞視年曆之經典甫士，只見坤坤高舉胳肋底，阿田則站於旁邊掩鼻，場面爆笑！
Bobby 30幾年零緋聞
再結劇緣的阿田與坤坤，被問到下次合作可會演情侶？阿田即說：「入行廿幾年，起初都會畀啲前輩撩，慢慢年紀大兼有氣場，都冇乜人敢撩我，但同吳業坤呢，佢每日開工都調戲我，我有少少覺得娛樂圈變質。」坤坤即稱是跟Bobby學習作反擊，不過在旁的Bobby卻說：「你問心，我30幾年嚟都冇緋聞，你3年來就個個月都有新緋聞，係咪你食死貓o架？」
無力招架 一味傻笑
坤坤聞言不停標汗，阿田邊拿紙巾為他抹汗邊繼續爆料：「開工成日叫我哋幫佢霸位，仲要幫佢買凍檸茶少甜添！」Bobby亦踩多腳：「同你第一次合作，唔尊重我冇所謂，但阿田睇住你入行喎！」被兩位前輩雙劍合璧「圍攻」，坤坤全無招架之力，只懂抹汗及傻笑，被問到可有膽量與阿田拍咀戲？他竟爆笑地望完阿田朱唇後說：「OK！（唔驚杜汶澤打你？）專業演員嘛！我又唔會非禮佢。」阿田卻似乎受不了：「我係專業，但對住佢會不期然唔專業，我驚一陣片場會發生命案，我自殺或者切腹呀！」
至於「收視福將」Bobby則透露與家人觀賞經典劇《壹號皇庭》時閒談，提及自己多年來也沒有半點緋聞：「當年《壹》劇都係會揀陶大宇，佢唔要嗰啲我冇理由要，我唔鍾意同人爭嘢玩同食。（呢個班底再合作？）男仔可能易啲，我哋咁多年都咁老友，仲有聯絡，都幾難得。」
文：影視組