石詠莉嫁鄧健泓捱罐頭都制！
鄧健泓和石詠莉下月正式結為夫妻，昨日兩人到對他們別具意義的西貢公然放閃，晒盲一班街坊！近年默默為未婚妻事業付出的鄧健泓，感謝對方甘願為他捱罐頭兼做煮飯婆，更讚她努力不懈，由地獄廚神進化到勁過未來奶奶！至於生B大計，他們並不心急，想享受二人世界！
43歲藝人鄧健泓（Patrick）和30歲的石詠莉（Sukie）下月29日拉埋天窗，結束五年愛情長跑，昨日這對未婚夫婦重遊西貢公然放閃，回味甜蜜點滴。他們均指西貢對其意義重大，不但是Patrick居住超過五年的地區，更是Sukie的成長地，不過Patrick笑指兩人拍拖前都未試過在西貢邂逅：「拍拖前成日話做完嘢搵日食消夜，到最後都仲係『搵日』，最有趣係未拍拖時有日喺海濱長廊放狗，有個黑黑實實嘅船長嗌住我，話『Patrick！我係石詠莉嘅爸爸呀！』」世事果然巧合。
多謝未婚夫
提到Patrick之前出錢出力幫Sukie製作兩張發燒碟，令近年重踏樂壇並有所成績的女友非常感動，更經常公開多謝未婚夫，她亦在訪問中感激對方令她磨鈍棱角，學識表達自己。問Patrick最感激未婚妻甚麼？他即指是甘願為他做煮飯婆：「佢好努力，由整啲好鹹嘅青口、牛扒，到之前問我媽咪梅菜蒸豬肉、豉汁蒸排骨點整，到依家同我媽咪比有過之而無不及！」又指Sukie以前抗拒食茄汁沙甸魚罐頭，但受他感染下，變成每次食即食麵必定配沙甸魚：「佢仲要係自己食一罐！」
他亦自言為Sukie出唱片時，自己在待人接物上有改進，因為想成為對方榜樣。不過，Patrick笑指未婚妻仍然有倔強一面，例如有次不聽勸告，照將原隻鹹蛋放入真空電飯煲，令鹹蛋「粉身碎骨」，令他哭笑不得。
「我仲好壯！」
雖然兩人性格迥異，男方快女方慢，仍有不少磨合空間，但Sukie好肯定對方是生命中的另一半，非君不嫁：「如果唔係我一早走咗喇！」問到婚後會否火速實行造人大計？Patrick直言未有咁快：「我想享受多一陣二人世界嘅時間，但好多人都提我今年幾多歲，所以會重新考慮一下，雖然我仲好壯！」Sukie就強調順其自然：「有嘅話係福分，唔會刻意追求。」
文：影視組
攝：劉智源
髮型：Vince Pang@ilcoplo（鄧健泓）、Casei@beijing hair culture CWB（石詠莉）
化妝：Kayte Fung（石詠莉）