荷里活性醜聞近期愈揭愈多，除了監製與導演被爆性侵數十名女子外，就連58歲的奧斯卡金像影帝奇雲史柏西（Kevin Spacey）前日亦被男演員Anthony Rapp開腔指控性騷擾，奇雲為保聲譽更「轉移視線」宣布「出櫃」兼向對方道歉，被網民與藝人留言鬧爆！
最近與楊紫瓊合演劇集《星空奇遇：發現號》（Star Trek：Discovery）的46歲美國男演員Anthony Rapp，前日接受傳媒訪問指14歲時曾遭奇雲性騷擾，事發時為1986年，當時奇雲26歲，二人因合作舞台劇《Precious Sons》而認識，有一日Anthony被邀請到奇雲屋企開派對，之後奇雲飲醉酒，並以「公主抱」來抱起Anthony放上睡房的床，更用言語挑逗他，之後仲壓在Anthony身上。不過Anthony推開奇雲，並立即離開睡房，他指自己曾向友人提過事件，但聽到一名律師表示難以成功檢控奇雲後，最終放棄。近來因很多女星勇敢地指控性騷擾的人，所以決定公開事件，並希望可以改變現況。
Anthony的訪問出街後不久，奇雲即於社交網Twitter及facebook發聲明：「我對Anthony Rapp作為演員好尊重同欣賞，我聽到佢個經歷覺得非常之可怕。好老實，我已唔記得嗰一次嘅事，件事已經係30幾年前。但如果我真係做咗佢所講嘅行為，我就欠佢一個真誠嘅道歉，呢個醉酒行為非常唔恰當，咁多年嚟令佢有咁嘅感受，我感到好抱歉。」
之後奇雲更「順便」出櫃承認同志身份：「呢件事鼓勵咗我去講出人生中其他事，我知道出面有好多我嘅傳聞，更因為我保護私隱而助長更多傳言。我最親近嘅人都知道，我曾經同過男人及女人拍拖，我人生中一直有愛過唔同嘅男人、同佢哋拍拖，而我現在選擇做一個同性戀者。我想誠實及公開咁處理今次事件，就由我檢討自己嘅行為開始。」其實奇雲多年來一直被傳是同性戀者，但從沒承認，多年前曾被狗仔隊影到與一名男子在山上疑似「打野戰」。
雖然奇雲勇於承認過錯兼「出櫃」，但卻被網民在社交網留言批評他想以公開同志身份來開脫自己性騷擾的行為。有網民嬲爆說：「奇雲史柏西係咪想將性侵未成年少男嘅事借公開性取向嚟轉移視線？」有網民亦鬧爆奇雲：「你將件有關受害人嘅事而轉移講自己嘅事，真係令我好作嘔！性侵犯並唔係有關性向，性侵係有關權力。」另有人更貼奇雲與好友美國前總統克林頓（Bill Clinton）的合照，形容二人是令人作嘔的「鹹蟲」。至於圈中人亦不忿奇雲的行為紛在社交網鬧爆，其中被淫魔監製Harvey Weinstein性侵多年的受害女星露絲麥高雲（Rose McGowan）留言：「拜拜，史柏西再見，輪到你去喊，所以我哋要同你說Goodbye！」
文：外娛組