開煤氣險炸學校 鄧月平整蠱同學牛眼塞口
有「巨胸翠如」之稱的鄧月平經常語出驚人，她與李拾壹昨日為ViuTV科學節目擔任嘉賓，自認是科學白癡的她自爆初中上科學堂開本生燈搞到差點爆炸，更試過將生牛眼塞入同學口中，嚇得李拾壹要收回讚她「娶得過」的評語！
藝人鄧月平（Larine）及歌手李拾壹，昨日為細So及J Lou主持的ViuTV節目《挑機》錄影。李拾壹透露上周跟Larine合作拍攝有關光棍節的影片及MV，對她印象非常好：「今日再合作覺得佢更加好，因為我喺呢個節目輸咗要受懲罰，佢要溝飲料畀我飲，佢好錫住我，落布甸、梳打同醋，只係畀細So慫恿落咗幾滴辣油，畀着我一定加隻曱甴落去，所以佢好體貼，娶得過！」Larine笑說：「因為ViuTV啲節目向來玩到好盡，我怕山水有相逢咋！」
嚇窒李拾壹
談到節目主題是「人與機械比賽」，不少小學生參與科學研究，Larine大讚他們厲害，自嘲是科學白癡的她又透露當年初中修讀理科時的烏龍事：「第一堂化學堂要用Bunsen Burner（本生燈）開火，我一嚟就開咗煤氣，老師即刻過嚟熄，爭啲爆炸。砌電路板我又完全砌唔到，明明跟足課本咁做。」
除了做實驗欠天分，Larine又自爆在生物堂整蠱同學的變態經驗：「有次要劏生牛眼，我刀工比較拿手，咁啱見隔籬個同學擘大口，我咪將個牛眼塞落佢個口度！哈哈！」嚇得李拾壹急急收回「娶得過」的評語！讀文科的李拾壹則自認科學麻麻，很佩服亮相節目的小學生。
文：影視組