袁偉豪出爆肌相集賀入行20年
藝人袁偉豪與苟芸慧昨日以盛裝打扮，為2017東方表行沙田錦標「時尚煲呔賽馬日」主持揭幕儀式。袁偉豪自言與女友張寶兒於衣着方面非常投契，並不時充當女友的攝影師玩街拍，又自誇Keep到Body，有意出慈善相集紀念入行20周年！
袁偉豪與苟芸慧昨日在沙田馬場，出席2017東方表行沙田錦標「時尚煲呔賽馬日」。兩人聯同東方表行集團董事總經理楊衍傑伉儷、東方表行集團主席楊明標伉儷、東方表行集團執行董事林慶麟及蔡國欽、東方表行集團顧問馮廣耀，與香港賽馬會賽馬業務及營運執行總監祁立賢主持祝酒及揭幕儀式。
孖女友玩街拍
以煲呔打扮示人的袁偉豪自言平日較多打領帶，但最近也開始研究煲呔，覺得可以代表男士衣着品味，並要多向公司的服裝部同事學習。問到會否跟女友張寶兒一齊揀衫？他坦言：「有，呢方面大家都幾投契，會一齊研究衣着打扮，我又鍾意揸機影相，佢就做我模特兒，大家玩吓街拍。（幫女友出相集？）都想。」提到袁偉豪與女友的定情節目《打工捱世界II》前晚奪得《星和無綫電視大獎2017》「我最愛TVB綜藝節目」，他笑言事前沒有想起此乃定情作，故在現場亦忘了多謝主持之一的女友，但事後已私下多謝對方，又冧爆表示這個節目最大得着是識到女友。此外，袁偉豪又自爆計劃推出個人相集，作為入行20周年的紀念：「我會請攝影師影我，由我自己策劃，近年有少少成績，而且又Keep到個Body，想留倩影，相集扣除開支會作慈善用途。」
回歸大自然
至於早前參與米蘭時裝周的苟芸慧，稱愈來愈喜歡時裝，她說：「今日個活動同時尚有關，可以參加好開心，我希望將來可以攞到同時尚有關嘅獎。」提到賽馬，苟芸慧自言經常跟朋友入馬場，自小已學策騎的她也有意養馬：「我知好多馬退役後可以養，想同朋友一齊養，因為養馬都好貴。我諗過喺加拿大買個農場養馬，我鍾意大自然環境，想自己種嘢食。」
現場星光熠熠，其他出席賓客包括藝人梁嘉琪、顏子菲、莊思敏、莊思明、名模Rosemary、名人王嘉恩、伍士榮、幸正權夫婦、雷怡暉、許慧莊及煲呔設計師王偉旭等，場面熱鬧。
圖二
東方表行集團執行董事蔡國欽（左起）、苟芸慧、東方表行集團董事總經理楊衍傑伉儷、東方表行集團主席楊明標伉儷、香港賽馬會賽馬業務及營運執行總監祁立賢、東方表行集團執行董事林慶麟、袁偉豪及東方表行集團顧問馮廣耀為「時尚煲呔賽馬日」揭開序幕。
文：名人組