李漫芬家有「金床」 與夫爭寵
藝人李漫芬（Fanny）9月於社交網宣布懷孕3個多月，佗B的她依然努力工作賺奶粉錢，婚後的Fanny跟奶奶相處融洽，連奶奶的愛犬「金床」亦非常喜歡她。講到「金床」，Fanny即滔滔不絕：「奶奶養咗『金床』9年，初期我好怕佢，但依家好錫佢，成日畀嘢佢食，佢好黐我，見到我拎餅餅就轉轉轉，好為食！」
Fanny指「金床」有個怪癖鍾意吹風筒，老公吹頭，牠就吹埋一份：「佢瞇埋眼好享受！老公當佢情人，返屋企係錫佢先過我，佢兩個好冧，始終佢哋好耐感情。有次『金床』唔小心咬親我，奶奶鬧佢，佢驚到後退，搞到我好心痛！」Fanny自小怕狗，加上鼻敏感，更試過因男友養狗而拍不成拖，Fanny慶幸「金床」令她改變。
