要愛情不要婚姻 張天愛有拖拍唔會第5嫁
曾經歷四段婚姻的著名時裝設計師、芭蕾舞蹈家張天愛，對愛情仍充滿期盼，揚言藝術家愛情觀特別豐富，但明言不會再婚，她說：「我自私，唔想畀婚姻綑綁自由嘅生活！」
現主力從事藝術工作，在內地開設舞蹈學校的張天愛（Flora)，教導小朋友跳舞，帶給她滿足感：「培育小朋友係我最開心嘅事，冇嘢可以取代，同我一齊嘅Partner要有90%接納我忠於培訓教育呢個理念，所以要做藝術呢行先可以接受到，藝術家愛情好豐富。（依家有拍拖？）有，我覺得人生有愛情係好自然，無論你幾大都要有愛情，但依家唔會再好似18歲時咁，為拍拖、結婚乜都唔理。（會否再婚？）唔會啦！除非有一個好特別嘅原因，可以話我自私，想要有自己嘅空間，結咗婚就冇空間，而且有好多責任要承擔。」
內地開舞蹈學校
Flora在舞蹈界40幾年，早前獲芭蕾舞時裝品牌Repetto邀請，設計一系列芭蕾舞裙及鞋，Flora的設計中有一展覽的舞衣更花了三個多月時間設計，靈感擷取自她鍾愛的70位著名芭蕾舞家。
8年前她在內地開學校，由零開始至今學生過千，Flora說：「舞蹈學校發展得好好，但就係少咗啲男仔，今次品牌好支持，捐咗獎學金畀我嘅基金會，畀啲比較貧窮嘅男仔，贊助佢哋，始終舞蹈，特別雙人舞一定要有男仔跳。」
望孫女愛芭蕾舞
已榮升嫲嫲的Flora，當然希望孫女與她一樣學芭蕾舞：「佢依家先歲幾，要等大啲先，佢好活躍，希望佢會鍾意跳舞。（生意由佢接管？）太遙遠，第時睇吓佢鍾唔鍾意先啦，開學校其實係好辛苦，要好鍾意先可以做到。」
文：名人組