埋身肉搏馬倩宜鄧穎芝被打爆嘴
歌手鄧穎芝（Vangie）去年曾參加女子MMA真人騷《G-1格鬥會》，日前她與《G-1格鬥會II》的參賽者馬倩宜（Happy）進行一場激戰，Vangie說：「因為工作關係，我認識咗Happy，我哋11月會應一個運動品牌邀請去美國訓練，咁啱我哋喺同一間拳館跟同一個教練練拳，但我哋未見過面，點知第一次見面就打到瘀晒腫晒，真係不打不相識。」
踢到大髀瘀咗
Vangie解釋Happy本周日要打第二場《G-1格鬥會II》，據知其對手很強勁，所以她就跟教練講可以陪Happy練習，Vangie笑說：「其實我已經好少練拳，畀番晒教練，我同Happy係交流吓，佢本身係健身教練，我話我教佢打拳，佢教我健身，點知我踢到佢大髀瘀咗一大撻！佢Send相畀我睇，我都覺得勁恐怖！嚇死我，我勁內疚！」
家人唔畀再格鬥
兩人埋身肉搏，Vangie當然都有損傷，她遭Happy一拳打落塊面，即刻爆嘴，比上次打《G-1格鬥會》比賽更傷，搞到傷痕纍纍，她笑說：「最搞笑我打完返屋企，佢哋見到我傷晒，問我咩事，我話同人打交。」Vangie坦言家人不會再讓她參加G-1格鬥會，但她會繼續練拳：「我同佢一連練咗兩日，可能我都好耐冇打，條頸痛到不得了，成個人散晒。」問到對Happy可有信心？她坦言：「係幾難贏，因為佢對手太犀利，盡咗力就OK，希望佢唔好受傷。」講到她11月將到美國接受做gym的訓練，她指很高興獲邀：「成個訓練為期一星期，到時我會留多兩星期玩吓。」
文：音樂組