打邊爐都吔一両金! 金剛大花筒 天跌錢落嚟都變窮

諷刺係真正嘅金剛（猩猩嗰隻）唔使着衫都已傲視曼哈頓，點解李信樵呢隻金剛賺一蚊就使十蚊去裝潢金身？問題在於佢太狹視喺自我虛擬世界，學金剛用唔鹹唔淡嘅廣東話話齋：「禾（我）最鍾意作（着）靚生（衫）！」佢揮霍程度，連緋聞女友小儀都不禁搖頭嘆息：「佢真係好大使，唔貴唔買，好似佢買條運動褲，話唔貴着唔慣，佢話貪條褲頭帶夠柔軟、夠幼，仲畀我睇咁話『係Made In Italee（Italy）！』」

風光時月賺200萬

金剛當年真係搵到食o架，憑佢搞笑功力，加上爛做嘅個性，每次節目只要有佢，就連Nuts哥都會坐喺電視機前聽佢「是但噏」當秘笈。隻身從台灣嚟香港嘅佢曾講過，當年月初銀行有80萬，月中又多60萬，月底又多80萬，月入200幾萬，月月如是，啲錢好似天跌落嚟咁易，喺呢個時候做單純嘅購物狂已經滿足唔到佢，所以成日走去萬歲，有次好友賀軍翔嚟香港，一行四條友走去打邊爐之嘛，埋單盛惠離地價過萬，當時等於食咗一両金落肚，仲要連佢自己都唔知食咗乜。

正所謂節儉係美德、揮霍就敗北，金剛好景時可以有風駛盡𢃇，但兜踎時就真係冇風搵鬼理，當佢事業唔多順，一年只接得一個騷咁大把時，本身無綫底薪已唔多，貧賤夫妻百事哀就咁發生，要同女友蕊蕊一人一半租屋住咁冇面，結果咪要同蕊蕊好心分手，點知傷完個心，個身都傷埋，36歲佬乜都冇，淨係有脂肪肝，男人未老先衰，係女都唔敢埋身啦，所以到依家仲係一支公。

小儀三哥有情有義

Nuts哥都話種咩因得咩果，當年佢食客三千，豪氣干雲，對朋友水裏水裏去，火裏火裏去，你有難，就睇到邊啲係真朋友。呢三年金剛幾乎食穀種，好彩有三哥苗僑偉伸出援手，借錢畀佢渡過難關；小儀把口就鬧佢洗腳唔抹腳，但見金剛肚餓仲請佢食好多餐好西，講真，好多人大難臨頭真係會各自飛，金剛遇到呢啲真朋友，仲唔滴水之恩湧泉相報咩？

依家金剛離開無綫簽咗新公司向外闖，係時間改變一下自己再殺出條血路。橫豎膠劇膠電影一籮，電影公司倒不如諗吓搵佢拍套《金剛King Kong》，金剛吊吊揈化身大猩猩爬上ifc勇救恩人三哥同小儀，夠晒溫情又有意義；又或者再Cult啲，拍套《金剛大戰金正恩》勇救地球，但最緊要係唔好搵人幫佢配音，因為大家都想聽到金剛講：「禾（我）係跟（金）奸（剛），禾（我）胡（唔）依（一）定要作（着）靚生（衫）！」

Nuts哥