青雲Plan定退休生活 住老人院煲劇
好戲之人劉青雲自爆是一名劇迷，有追劇的習慣，更可一日睇足三套。不過，他笑言不會再睇自己的作品，留待退休後到老人院慢慢煲！
影帝劉青雲昨日以宣傳大使身份現身銅鑼灣出席now TV 2017年第四季度全新節目巡禮，活動上播出由他演出的點播服務宣傳片，青雲以多個趣怪手法演繹口號「又點播」，相當洗腦又搞笑。
笑言鬧人減壓
青雲又與「小青雲」合照，繼續二次創作「唔返學又點播」，並傳授演出技巧，搞笑表示當投入新角色感壓力時，會鬧人減壓。問到身為影帝的青雲有否即興自加趣怪對白？他笑言：「我都係跟佢哋劇本咋，邊敢自己講呀？」
青雲更透露愛追劇：「最多一日睇兩、三套啦。（同太太郭藹明爭電視機？）唔會，大家清楚對方想睇乜。（用電影人專業眼光去睇？）我係一般觀眾咁睇，好開心咁去睇(口架)。（有邊套戲會一睇再睇？）以前有，做電視台收工都兩、三點，錄影機錄咗乜就睇乜，睇到攰瞓着為止！」問會否翻睇自己的作品？青雲即笑說：「少啲，我諗住之後都唔睇喇，留番退休住老人院先一次過睇，咁樣先最客觀同清晰。」
講到近年點播服務的出現，對傳統電視帶來衝擊，曾是電視演員的青雲亦直言：「冇辦法，要去適應，都會影響埋電影添啦，係大勢所趨，好多人都拎手提電話睇戲，我就唔得喇，太細部，睇戲都要去大銀幕嘅，都係畀大家多個選擇。」
文：影視組