前晚一眾女星包括楊思琦、鄧洢玲、張文慈等出席珠寶派對時大行性感，甚至連一向骨感的前港姐冠軍陳凱琳，亦罕有Deep V上陣！她自爆出發前給男友鄭嘉穎過目，嘉穎也嚇一嚇，隨即遞上披肩，深怕女友被睇蝕。

陳凱琳（Grace）前晚罕有以淺藍色Deep V裙，晒出心口撐時裝設計師何國鉦與珠寶品牌crossover派對，她笑指出發前有給男友嘉穎過目：「佢都『吓』一聲，之後我話大會指定都尊重嘅。（佢畀你性感？）臨出門前都有拎件披肩畀我，出到街畀人睇到就唔好。（驚你被睇蝕？）驚我冷親，打風嘛！」早前她隨男友看網球比賽，第一次現場睇比賽，感覺很刺激，又覺得是很好的拍拖節目，問到可會遷就男友喜好？她說：「又唔會，我本身冇咩特別興趣，共同喜好係做戲同睇戲。（會玩角色扮演？）唔會，平時已經成日演戲，戲外要做番自己。」提到下月為好友陳嘉寶婚禮擔任姊妹，Grace笑言會盡量接花球，但未知是否一接就要嫁：「睇吓傳統係咪咁靈！」

另外，楊思琦透露剛拍完網劇，因劇中有不少動作場面，加上感冒有骨火，手臂瘀黑了一撻。她表示女兒早前到公園玩，跌倒致下巴瘀黑，母女同樣當黑，又指女兒很黐身，經常致電表示掛住媽咪。

而張文慈提到好友張栢芝傳被陳勳奇鬧不專業，她說：「陳勳奇都冇鬧佢，栢芝好有演員道德，做嘢好投入、好認真、好聰明同好快。」此外，名模Rosemary前晚連趕兩場，先出席金鐘海濱的時裝騷後，再趕往何國鉦的派對，睇騷時與昔日合作的模特兒重聚，令她一時技癢，希望有機會再行騷。

文：名人組