Amanda S.驚艷變髮 男友讚有新鮮感
昨日混血名模Amanda S.施「髮」術，以一頭金色短髮示人，驚艷全場。雖然她表示獲男友讚有新鮮感，但又擔心髮色會影響工作。
名模Amanda S.、Danielle、藝人王敏德與長女王曼喜昨日以嘉賓身份，出席「香港亞洲之友及保誠香港網球公開賽慈善名人午宴」，各人大顯身手，炮製午宴不同菜式。本身廚藝了得的Amanda炮製網球造型的朱古力甜品，甚具特色，Danielle則煮鱈魚柳和焗西班牙蔬菜蛋餅兩道菜式，賣相令人垂涎三尺。染了一頭金髮的Amanda捧着甜品時，恍如變了外國大廚，她笑說：「依家係完全一個外國人，唔係混血兒，因為我去咗一間新Salon，髮型師叫我信佢，話我可以好似超模Linda Evangelista咁多變化，我擔心話自己可能做唔到，但又Work喎！」
「好似有新女朋友」
問到男友是否喜歡她的新造型？Amanda說：「佢話好似有個新女朋友咁，好有新鮮感，（叫男友染埋一份？）佢啲頭髮好靚，好少轉髮色。（轉咗色會唔會多咗工作？）好緊張，之前8月拍過謝霆鋒嘅飲食節目，遲啲要再拍，點算？雖然唔使連戲，但今次會同佢去一個地方，唔知（髮色）喺大陸市場會唔會有問題，唔知點算！」
王敏德尊重子女決定
王敏德和王曼喜以家中種植的椰菜花和小黃瓜合力炮製沙律。提到吳綺莉女兒卓林早前出櫃，郭秀雲卻對卓林的另一半作出批評，身為家長的王敏德坦言子女曾經歷反叛期：「其實佢哋好聽話，嗰時太太馬詩慧都畀好多壓力，做媽咪係嚴啲，見過佢話仔女時，我都好驚訝！我會喺後面講番我嘅意見，點做由佢哋自己決定，我哋一家係Good Team。」
同樣已出櫃的王曼喜表示不認識卓林，不便評論，認為外人不應該批評：「覺得係一個溝通上問題，冇話尊唔尊重，媽媽同個女嘅關係，要傾同多了解，互相尊重。17歲話大唔大，話細唔細，希望佢哋達到大家了解嘅地步。（希望佢哋母女快啲好番？）每個屋企都有佢哋嘅問題。」
文：名人組