謝安琪生B走樣為大肚婆發聲
產女後的謝安琪（Kay）一直養尊處優，卻遭涼薄的網民惡意攻擊她肥及走樣，護妻心切的張繼聰即發文還擊，怒斥網民欠修養。Kay對老公百般維護大表感動，又為所有大肚婆發聲，指懷胎十月的媽媽不但意義重大，更應值得尊重！
謝安琪遭網民攻擊肥兼走樣，又指她與張繼聰都曾整容，阿聰將網友的刻薄留言截圖放上社交網並發文護妻：「香港有言論自由，可惜未必每位朋友都有尊重別人嘅修養。我好少放喺心，不過講我太太，我就講幾句。」他大讚太太的靚是事實，毋須證明，又感激Kay十月懷胎之苦，是偉大的媽媽。
冇可能生完即瘦
至於Kay則坦承生完B後未有刻意收身，因將全副心思放在女兒及家庭上：「大家好似覺得女藝人生完BB要好似冇生過即刻瘦番，其實係超乎常人。」她笑言自己都是平凡人：「有人願意為部戲增肥幾十磅做好角色，得到好多人敬佩，但我係為懷孕而肥咗，我好尊重呢件事，覺得意義好大，係咪應該更加尊重。我都想同其他媽媽共勉之，生完小朋友身形未如理想，唔好太心急畀自己太大壓力，身體要緊，我覺得呢個訊息緊要啲。」
感謝老公護航
Kay深信會慢慢瘦下來，並說：「我有做運動，只係冇好嚴峻去極速減肥。」她又感謝老公的維護：「都好感動嘅，原本我真係唔係咁肥嘅，都幾弗（口架），我先生咁做係出於愛護之心，係一件好唔應該釀成太大痛苦嘅事，佢咁樣維護我，依家承受少少苦楚都係值得嘅。」她表示阿聰的留言令她更有目標：「佢話我將會比以前更弗，係佢真心期望定係鼓勵我呢？咁都畀咗啲說話我聽，我會努力加油。」
Kay明白大家有言論自由，同樣她也有自由選擇怎樣面對：「我選擇放開啲，唔好咁介意，希望各位網友、其他好錫我哋嘅人，大家都唔好過分激動，唔好互相攻擊，我明白作為我嘅另一半，佢睇到呢啲評語會好肉赤，反而我自己最冇乜情緒，如果我咁樣肥豬豬，遲啲透過運動、節制飲食，學阿聰話齋弗過以前，呢個先係勵志故事，大家等睇我呢個勵志故事。」
文：音樂組