吳浩康淚謝Mani 自責冇好帶挈
歌手吳浩康（Deep）相隔8年再開大型演唱會，將於12月10日在九展舉行《吳浩康LISTEN TO DEEP LIVE 2017》，昨日他為個唱舉行記者會，期間經理人霍汶希（Mani）上台打氣：「Deep經歷嘅高低起跌，我身為佢經理人係好深刻。」Deep即愧疚地說：「你最肉酸嘅相都係我帶挈你。」Mani就指不要重提往事：「每個人都有錯過，冇人可以放逐你，只有你放逐自己，你行好你嘅路，全英皇上下都會支持你，你下一站就係紅館！」
開騷唔預女友
接着Mani望住Deep說：「你知你呃過我啦，仲唔止一次，但我覺得今年Deep成熟咗好多，人有成長就有經歷，前幾年Deep媽咪離開咗，佢有日同我講『家姐，我好後悔，媽咪喺度嘅時候我冇好好表現畀佢睇，亦冇畀到幸福佢』。」此時Deep即眼濕濕，Mani就鼓勵他要做好工作，母親會知道的。講到Deep曾犯過失，但公司仍對他不離不棄，他說：「公司對我已經超越咗一間公司對藝人嘅關係。」Deep稱個唱暫得一場，會否加場留待公司安排。問女友李昭南可會做嘉賓？他說：「唔敢亂咁搞佢，佢有佢嘅音樂發展。」
另外，排舞師麥秋成亦有出席記者會，講到緋聞女友蔡思貝近日與王浩信傳緋聞，他指沒留意報道，但相信對方懂處理亦信任她。
文：音樂組