蕭正楠黎耀祥叮囑小心 曹永廉闖賭城登台唔敢周圍走

入行超過20年的曹永廉近年人氣爆燈，去年勇奪台慶頒獎禮「最佳男配角」，人紅工作自然多，除11月初夥拍好兄弟蕭正楠和黎耀祥等到布吉拍攝旅遊節目《公公出埠》外，本月中他將到美國三藩市及拉斯維加斯登台，本月16日52歲生日的他，屆時要「留守」美國開工！

唔敢高攀Kenny G

雖然收入可觀，然而拉斯維加斯近日發生恐怖槍擊案，阿廉今次可謂「冒險」搵真銀！據他了解，登台工作並不會因此取消，他昨午接受電話訪問說：「海報都出咗，應該唔會改期嘞。根據行程，我會先到三藩市唱3場騷，留幾日再等廿零號落拉斯維加斯唱多1場，依家咁樣惟有自己小心啲囉。」

阿廉坦言抵埗美國後，並沒打算「四圍去」﹕「到時會帶埋iPad去，喺房睇吓嘢、玩吓，再唔係落街喺附近食吓嘢、跑吓步，唔會周圍亂走嘞。今次啲騷喺室內舉行，安全性應該會高啲啩。」談到10月16日生日，他表示今年在美國度過：「咁生日做騷好事嚟嘅，唔係成日有咁多騷畀你做嘛。大會同我講，話想安排Kenny G幫我伴奏，我聽到受寵若驚，真係唔敢高攀喎。」

阿廉好友蕭正楠目前在多倫多登台，對於阿廉將到拉斯維加斯，他說：「佢今年都幾多登台演唱，會叫佢小心啲。會叫佢唔好咁貪玩、唔好周圍走，你知拉斯維加斯都好多吸引嘢嘛！」當提到槍擊案，阿蕭坦言：「睇到呢啲新聞當然唔開心，但要搵食搏緊殺都冇辦法，希望大家平平安安。今次我喺多倫多室內演唱，都安全啲，大家唔使擔心。」

祥仔寸兄弟「贈興」

至於黎耀祥得悉阿廉月中往登台，即打趣說：「唔擔心嘅，嗰啲二萬人嘅音樂會，阿廉呢啲廿幾人嘅演唱會應該好安全嘅。」每年農曆新年祥仔都會到拉斯維加斯登台，明年亦不例外，他淡定回應：「我哋通常都係做酒店晚宴同貴賓聚會嘅登台，而且室內嘅多，唔係完全Open畀公眾，我會盡量避免去人多地方，唔使太擔心，況且都唔擔心得咁多。」

文：影視組