Khloe接Kylie棒懷孕三個月？

Khloe早前在真人騷節目《Keeping Up with Kardashians》中揚言想與拍拖一年的NBA球星男友「孖T」卓斯坦湯臣（Tristan Thompson）生兒育女，所以冇再避孕，怎料「開口中」即傳出有喜的消息！有傳Khloe已懷孕三個月，目前仍未知道BB性別。而Kim的代母與Kylie被指預產期為明年1月中，若然Khloe真係有咗，BB將於明年三月出世。

知情者說：「Khloe同卓斯坦將會有BB出世，佢哋都好開心，佢哋本來都唔想趕住同大家講，所以只係同身邊最Close嘅人講。」但由於同母異父妹妹Kylie上周突然傳出懷孕消息，即令Khloe措手不及，知情者說：「件事變得有啲複雜，因為Kylie宣布咗，佢哋唔想搶佢風頭咁，但又去到一個位Khloe唔想再呃大家，再保持沉默已經唔得。呢個係Khloe等咗好多年嘅事，唔止係咁，佢仲想等一個合適嘅關係，佢之前同奧當刻意唔生，亦唔想同其他拍過拖嘅人生，但呢個對佢嚟講係一個好好嘅時刻，佢唔單止會做媽咪，仲會同一個真正愛嘅人一齊養育孩子，大家都為佢哋好開心。」今次是Khloe首次佗B，至於卓斯坦則與前度Jordan Craig育有一名兒子。而Khloe於2009年9月曾與NBA球星奧當（Lamar Odom）結婚，但於2013年離婚收場！

Kourtney將宣布又有咗？

Khloe大肚的消息傳出後，網民反應甚大，新聞記者Marc Malkin在社交網留言：「連Khloe都有咗？真係永不完結嘅Kardashian故事！」又有口痕友留言指Kim為了收藏BB而搵兩個妹Khloe與Kylie做代母，更有網民指Kim找代母及Khloe與Kylie同時有咗，世界即將末日！有網民預測Khloe另一妹妹Kourtney都快將宣布再次懷孕。

文：外娛組