羅霖否認喜訊驚孤獨終老
身邊不乏追求者的羅霖，昨日出席活動時卻自稱勁驚孤獨終老，更突然「灰到裂開」大嘆就算嫁有米老公，亦唔擔保一直有錢！提到好友王瑋日前祝她好事近，羅霖即否認喜訊：「佢緊張我先咁講！」
藝人羅霖、薛家燕和李漫芬昨日出席「Mi 8健康食品專門店」開幕活動，齊齊分享健康和養顏心得。有「美魔女」之稱的羅霖坦言因為媽媽做護士，故自小已注意飲食，堅持每朝早食粥、蛋和麥皮，不過她自爆有不太健康的嗜好：「我戒唔到薯片！」
唔恨嫁入豪門
羅霖坦言一直都有很多追求者，提到前亞姐好姊妹王瑋日前祝她好事近，問到是否有喜訊要公布？她卻說：「唔係，只係一班好朋友敍舊，王瑋緊張我先咁講，目前都係專注囝囝嘅學業先。（買樓首期畀晒啲仔讀書？）係，所以我放棄咗買樓喇，等個仔大學畢業、出身先算。（嫁咗有老公養！）未搵到結婚對象，我始終覺得女人要經濟獨立先有自信，就算嫁個有錢男人，唔擔保一定Keep到有錢。（咁灰？）等幾個仔出晒身先，希望我啲追求者未走晒，唔好孤獨終老，哈哈！」
薛家燕跳舞下廚
薛家燕表示與專門店老闆相熟，其女兒是她的學生，故特別前來支持。談到不少藝人在網上平台大展廚藝，她笑指可以玩埋一份，跳住十字步下廚：「我最近練緊Moonwalk加入十字步跳法，準備做騷演出。（煮食都可以跳十字步？）可以，好Enjoy o架。」
文：影視組