李晨微軟魔法攻陷冰冰

男人以為硬繃繃就無往而不利，李晨教你，追女唔使用劍嘅！「微軟」精髓在於心思細微，下靶位唔怕做，識得用軟功玩女上男下！李晨出晒名抵得諗唔怕蝕底，尤其對女朋友好似湊女一樣！半夜起身煮消夜、成日短訊問食飽未，呢啲都係小兒科，眾目睽睽踎低幫冰冰綁鞋帶；接收工時好似接放學咁，舉高冰冰又抱又攬；冰冰唔小心拍到自己，第一時間反問對方隻手痛唔痛，講到呢度，我Nuts哥都開始毛管戙！

負傷床戰交足貨

最爆嘅，係被問房事佢實報實銷照答唔兜圈，話一落機即刻「開工」，仲開心Share「人體力學」，話雖然右手手指骨折，但支點照有，就係隻手可以反轉撐住，一樣暢通無阻「出入平安」！古有巴黎鐵塔反轉再反轉，今有李晨反手搵支點，冇咁上下身手同柔軟度高，加上指功強勁，都好難負傷上陣！傷手都床照上冇揸流攤，盡展男兒本色，夠晒責任感，服未？對住財力強勁、爭在大炮同穿梭機未買嘅冰冰，李晨親身示範要冧女，要識得玩平民浪漫以柔制剛，錢唔係大晒！佢識玩都唔係今日嘅事，歷任舊愛都收過佢送嘅心形石頭，雖然被寸係石頭批發商，但橋唔怕舊，最緊要受，憑住舊爛鬼石頭都冧到咁多件，抵啦！

女尊男卑已Out！

男人最怕女人問「我係咪肥咗？」點答都出事！李晨以「多肉妹妹」嚟形容肥咗嘅冰冰，因為多肉身材仲正斗，仲好似小妹妹咁可愛！嘩！完全避開晒「肥」、「胖」、「脹」呢啲堅係「人身」攻擊嘅字眼。「我係咪瘦咗？」仲大單，答瘦咗即係話身材冇睇頭；冇瘦，即係肥啦！佢就用「小白妹妹」嚟稱呼瘦咗嘅冰冰，話個人健康咗可愛咗又白咗喎！口技超卓，識冧人同噬人！舊愛張馨予玩嘢抽水兼有傳冰冰係小三，李晨反擊爆料指分手因對方出軌派綠帽，仲絕到話：「願你走好，此生不再交集！」仲搭多句話未來嘅任務係保護冰冰！型！

當初人人以為李晨Hold唔住冰冰嘅霸氣，依家冰冰嘅霸氣跌晒Watt，武則天變小綿羊！女尊男卑？Out啦！只有你老竇嗰輩先介意女人叻，依家好多男人都為有個叻老婆而自豪，仲覺得自己好叻識揀。財貌雙全，女人極品，識揀梗係揀范冰冰！你話李晨抱得美人歸，我Nuts哥反而恭喜冰冰抱得李晨歸，因為佢都識揀，知道好男人同大男人分別：好男人識得自我犧牲氹另一半開心，大男人只想另一半付出捱苦氹自己開心。

Nuts哥