Yumiko手機氹女捱轟認衰：係唔啱

星媽Yumiko帶同2歲半大女兒梁子柔（梁浸浸）拍攝的內地親子節目《不可思議的媽媽》於上周六晚首播，其他媽媽成員還有田亮太太葉一茜與陳浩民太太蔣麗莎等。以「賣萌」聞名的梁浸浸頓成焦點，但因不習慣陌生環境，平時可愛的她卻不停扭計狂喊，令又呵又氹的Yumiko「頭都大埋」，更無助到陪着懷中的女兒一齊流眼淚，相當慘情。

其中，Yumiko為發燒中的梁浸浸探熱時，女兒不肯就範之餘更起飛腳，「兜」中她的右眼，忟極之下疑似爆粗鬧女兒：「……點解你咁曳o架啫？」亦有網民質疑Yumiko的湊女方式，指她任由梁浸浸沉迷玩手機，玩到差點倒豎葱碌落床，幸好Yumiko及時捉住腳仔未致受傷，但已嚇到面青。

湊到頭都大埋　忍唔住喊

身在內地的Yumiko昨日接受電話訪問，否認爆粗鬧女：「我冇講粗口。」但承認用手機氹女兒方法不當：「平時喺香港係好少，亦唔鍾意畀佢睇電話同iPad，但為咗安撫佢，唯一呢個唔應該做嘅都做埋，所以我都覺得自己係唔啱嘅。」她又補充其教女方法屬非主流，認為每個人都有不同方法照顧小朋友。

Yumiko出動「電子奶嘴」，畀梁浸浸玩手機，惹來網民批評。	梁浸浸扭計兼起飛腳疑似踢中阿媽，Yumiko無計可施下崩潰落淚。	放大圖片

提到節目中湊女湊到喊，Yumiko坦言一向硬淨，但當時實在忍不住：「因為自責畀唔到安全感個女，搞到佢喊住要返屋企。」談及收視反應佳，播出至昨晚9時有逾9,000多萬播放次數，日內1億在望，Yumiko覺得非自己功勞，覺得觀眾對六組親子方法皆有興趣，還預告最後收服女兒！

文：音樂組