「雙豪」合璧搶5億點擊「搜」度熱爆

《使徒行者2》劇情緊湊，劇中演員苗僑偉、陳豪、黃翠如、袁偉豪、周柏豪及許紹雄等角色都有突出表現，此劇於香港口碑、收視不俗，首周24小時跨平台總收視有24.8，而首播當晚更有26.7收視，觀眾達173萬多，為今年二線劇首播之冠。而於內地網站騰訊點擊成績亦熱爆燈，首星期點擊已超過五億，比之前另一口碑佳的《踩過界》播放兩季後總點擊五億多超出幾條街，連帶劇中演員都成為內地搜尋網的熱搜人物，尤以「雙豪」袁偉豪及周柏豪人氣最盛，粉絲激增。

翠如：多咗人留意我！

袁偉豪昨日接受訪問時坦言開心：「每一日都過億真係好犀利，至於搜尋榜上啲數字對我嚟講好陌生，因為自己較少留意。」說到有不少內地觀眾認識，會否希望有多些內地拍劇或搵真銀機會？他說：「終極希望係多啲同唔同單位合作，有得拍內地劇或者接內地工作當然更好，呢啲都要等公司安排。」而身在泰國為此劇拍攝特輯中的女主角黃翠如亦甚受內地粉絲愛戴，她受訪時說：「內地反應好好，都多咗好多人留意個角色同我。（內地掘金？）冇諗咁長遠呀！寄望大家繼續睇落去，最緊要係個製作好。」

「天堂哥」戲份突出

至於此劇監製蘇萬聰坦言對五億這個數字相當滿意，他說：「最高興係上星期五，單單一日點擊已破一億點擊，算係叫好又叫座，希望內地對港劇有番信心，畀啲鼓勵我哋。劇中有六、七個演員榜上亦佔首幾位，好多內地女粉絲都好Like柏豪，不過隨住袁偉豪『天堂哥』出現，戲份同場口都相當突出，其粉絲量同柏豪都差不多。」

另外，袁偉豪趁住陽光普照跑去滑水，他將滑水相上載到社交網，見他赤裸上身展示肌肉，甚有睇頭，滑水技術有姿勢有實際，他留言：「白天的事白天做！好好建立自己的生活 、好好建立自己的興趣。」

文：影視組