迪麗熱巴處女行騷衰跌膊
【陳嘉敏、劉智源米蘭直擊】憑電視劇《三生三世十里桃花》而人氣急升的內地女星迪麗熱巴，升呢為米蘭時裝周行騷！米蘭時間23日，她為Dolce & Gabbana 2018春夏時裝騷獻出處女貓步，翌日獲安排坐頭排睇騷。對於處女Catwalk的表現，她自評有88分：「覺得自己太緊張！（有冇發生咩意外狀況？）我件小外套行行吓跣咗落嚟，印象中啲模特兒唔會用手整理，所以一直唔敢用手整番好件外套。」
同場還有順道來睇騷的名模琦琦，兩人相遇即席合照。琦琦透露今次主要為其珠寶品牌傾談合作：「呢邊有人想同我合作，好多人又話幫我開舖，但想睇定啲暫時以Online為主。」她又透露與友同行，吸取上次來米蘭大吃大喝致胖的教訓，笑言今趟只准吃八成飽。
另外，星級形象指導郭慶彬亦到米蘭潮拜著名鞋履品牌設計師Giuseppe Zanotti，笑言是去米蘭的指定工作之一。他表示今次行程頗為辛苦，皆因被交通所折騰，更在不知情下的士司機竟多載一個陌生人，無端端變坐「泥鯭的」，令他啼笑皆非。
