美國才藝比賽真人騷《全美一叮》（America's Got Talent，AGT）賽果於香港時間今晨公布，入圍決賽的十強昨日再度演出，兩大奪標熱門「腹語女」Darci Lynne與「小雲妮」Angelica Hale盡地一煲施展渾身解數演出，獲評判激讚，前者更被評判睇好「Sure Win」!
自9歲的「香港小巨肺」譚芷昀（Celine）上周決賽止步後，《AGT》焦點落在兩位年紀最小的參賽者10歲的Angelica及12歲的Darci身上。Angelica昨日打頭陣表演，她以英國電子組合Clean Bandit的名曲《Symphony》出賽，Angelica擘大喉嚨大晒「超必」海豚音，四位評判即站立拍手讚賞，其中Heidi Klum激讚Angelica人仔細細似巨人，而Mel B就力讚她好自在唔緊張，Simon Cowell則似有「弦外之音」說：「我感覺唔係父母幫你揀歌唱，而係你嘅選擇，就因為咁令你同首歌有關聯！」似是寸緊已出局的Celine！
至於「腹語女」Darci今次破天荒帶同之前分別出過場的「鼠男兔女」兩個布偶出戰，玩棟篤笑搞氣氛之餘更一人分飾兩角，「唱出」披頭四（The Beatles）名曲《With A Little Help From My Friends》，技驚四座！四名評判站立拍掌致敬，一致看好她會奪冠，Mel B大讚：「我嘅上帝，你係毫無疑問好犀利好犀利好犀利。你得12歲，仲要係自學，本來又好怕醜。我一開始已經話你可以贏，但大家要投票先得！」Simon亦大讚她討得所有年齡層的歡心，並認為她會贏！
此外，同樣被視為熱門的兩位「唱家班」Evie Clair與「新Adele」Mandy Harvey的演出亦獲讚賞。其中13歲的Evie個多星期前父親因癌病離世，成功晉級的Evie受喪父打擊後再踏舞台，以傷感演繹出Louis Armstrong名曲《What A Wonderful World》。Evie今次冇自彈自唱，唱完後獲四位評判齊齊站立鼓掌。
另一方面，Simon對21歲唱作男歌手Chase Goehring的評語亦似寸緊Celine！Simon大讚Chase不是翻唱別人歌曲的「K歌歌手」。十強參賽者實力旗鼓相當，美國博彩網的最新賠率顯示Darci仍是奪冠頂頭大熱門。
文：外娛組