梁烈唯被拖數：夠個女一年學費
藝人梁烈唯（唯唯）自爆於馬來西亞登台被拖數，款項更足夠交女兒一年學費！唯唯表示由於該登台搞手愈呃愈多人，受牽連的藝人包括李璨琛及林子善等，遂決定公開事件。而子善則指雖無被對方拖數，但相當自責，因該搞手是透過他去找唯唯工作，令他又嬲又難受，並呼籲同行要小心！
梁烈唯前晚於社交平台透露早前在馬來西亞出騷後被拖數，昨日他出席無綫新劇《是咁的，法官閣下》開鏡儀式時詳述事件經過。他表示去年聖誕節前夕獲邀到馬來西亞打碟，起初對方傳了一張收據給他，令他以為對方已經入數，但過了約一個月才發現對方根本沒有過數。問到損失金額多少？唯唯直言：「夠我個女一年學費！」
被冒名呃人投資
事事為別人着想的唯唯，直言開頭以為對方手緊才拖數，但後來發現問題相當嚴重：「開頭我諗住可能對方唔方便畀住，所以唔想公開事件，但之後佢冇悔改，反而用我哋藝人嘅名去呃投資方，繼續收人錢。好似李璨琛、林子善都畀佢利用，佢通常會成功約我哋做一次表演，之後就不停用我哋嘅相片去呃人。我知道最近佢又話我九月會去馬來西亞表演，根本冇咁嘅事，好在有朋友同番子善講！佢咁樣做會令人誤會我哋應承咗然後甩底，所以一定要公開澄清，我哋同佢嗰邊係冇關係！」問唯唯會否考慮報警？他表示：「公司已經循法律途徑出信畀佢哋，暫時嚟講我損失最大，我哋都希望可以一齊出聲講番件事，第一係等唔好再有其他藝人畀人呃，第二係希望佢可以畀番應得嘅酬勞我哋！」
林子善(興)爆自責
而林子善昨日接受電話訪問時，表示沒有被拖數，但因梁烈唯被拖數而自責：「呢件事我好(興)，因為之前嗰個人搵我，話想搵唯唯做嘢，咁我咪幫手問，唯唯亦經TVB接咗個Job，點知最後尾期收唔到，我好自責！而最近，大約幾個星期前，知道有其他朋友受害，組合MP4都畀佢拖尾數，所以真係要公開件事，希望嗰個人快啲還番錢畀我身邊嘅朋友。」子善直言認識對方的家人，知道其實對方和家人亦有錢銀瓜葛：「佢屋企人都畀咗一百六十萬馬幣佢做生意，到依家一蚊都冇還，佢呃人太多，所以啲錢都好難收得番。」
李璨琛雖然沒有被那位登台搞手拖數，但對方曾利用其名字去呃登台老闆的錢，李璨琛表示：「我完全唔知發生咩事，係朋友話畀我聽，後尾子善撞到嗰位老闆，同佢解釋番先清楚成件事係點。」
文：影視組