視帝陳展鵬與單文柔（Phoebe）今年三月爆出戀情，兩人相戀短短半年愛得癡纏，關係火速升溫更進展至同居階段！昨日兩人雙雙返抵男方將軍澳寓所時斷正，被撞破的他們表現甜蜜還大方受訪，坐穩女友之位的Phoebe全程冧笑。

40歲無綫小生陳展鵬自與27歲落選港姐單文柔（Phoebe）相戀後，雖然一直未有親口承認戀情，但每當展鵬被追問拍拖一事時，明顯對女友處處維護，默認親密關係！

而甘做背後女人的Phoebe亦不時與男友隔空打情罵俏，又直言不介意名分。她日前就上載一張於外地晒線騷胸的開餐照，與展鵬跟林敏驄在東莞打高爾夫球的合照背景十分相似，看來Phoebe已融入男友的朋友圈，做跟得女友陪展鵬打波。

其實Phoebe除了融入男友的朋友圈外，原來亦早已融入家中，相戀短短半年的二人愛得甜蜜，關係極速升溫，雙雙於男方位於將軍澳的寓所同居。

昨日下午約二時，展鵬驅車接載女友返回將軍澳寓所，當座駕駛入停車場時，兩人發現記者即一臉愕然，坐於車內的Phoebe亦不懂反應，只望向男友傻笑。戴上口罩及鴨舌帽的展鵬隨即落車，護花心切的他更手指指，友善地向記者表示：「我哋泊完車轉頭出去傾啦。」

未幾展鵬與Phoebe離開停車場，沿途步上樓時兩人更企定定大方接受訪問，問到展鵬做柴可夫管接管送接載女友回家同居一事，沐浴愛河的他心情甚靚，更笑笑口打趣說：「呢度唔係佢屋企喎。（呢度係你屋企嘛。）其實之前都講過啦，嚟緊好多Annual Dinner要出席，咁又要揀衫，咁又冇啲適合嘅地方可以去。」此時Phoebe亦在旁邊點頭邊冧笑和應：「係呀，係呀。」

當再追問是否上其寓所揀衫時，展鵬解釋：「唔係，上Club House嗰度，因為聽日（意指今日）有個講座，嚟緊《同盟》又慶功，都需要揀衫，所以上去Club House囉，大家都可以上去o架。」說罷便與女友肩並肩，雙雙步行入大廈內。風騷的展鵬，離開時遇上管理員，更與對方揮手打招呼。

文、攝：追蹤組