李彩華儲足彈藥 兩年後嫁人
藝人李彩華16歲入行，在圈中打滾多年，近年主攻內地市場，發展一帆風順、名利雙收。今年她更作出突破，推出以唯美為主題的處女寫真集，又將在港舉行個唱再戰樂壇。事業創出佳績，她感激男友何遠恒的陪伴和支持，更揚言婚事會在兩年後發生，並計劃生兩個小朋友組織家庭。
開個唱有壓力
現年33歲的李彩華（Rain），16歲時以歌手身份進軍娛樂圈，近年在內地發展理想，拍了多部人氣內地劇。今年她推出首本個人寫真集，以清純和唯美形象示人，大獲好評。今年十月更會在港舉行其個人演唱會，重拾咪高峰在舞台與粉絲見面。對於久違的歌唱事業，她坦言有一定壓力：「其實自己都好耐冇喺香港幕前出現，早排亮相節目《流行經典50年》，唱咗首《你唔愛我啦》外界反應好熱烈，令我好驚喜，估唔到呢首歌勾起大家咁多回憶。」問到可有為個唱感到壓力？Rain表示：「內地經常有登台、商演活動，都有唱歌，不過內地演出以帶動氣氛為主，今次喺香港個演唱會要籌備得好充足，事前要用時間去揀歌同綵排，開騷時間愈接近，依家開始緊張。」
欣然接受評價
由於近年主力在內地拍劇，其歌手身份漸被淡忘，談到網民現時經常尖酸批評歌手唱功，Rain坦言入行多年，已煉成金剛不壞之身，面對惡意負評亦懂得以高EQ處理：「如果EQ唔夠高，真係可能會做出傻事。其實從另一角度去諗，網民寫得出啲評論，證明佢哋有花時間去睇晒我整個演出，所以係要感謝佢哋用時間去睇，成為我其中一個觀眾，真係要同佢哋講聲多謝。」她又表示會接納各種意見：「我明白冇理由全世界嘅人都會支持我、擁戴我，但我都會參考晒各方面嘅留言，睇吓自己有咩需要改善。」Rain憶述當年內地劇《回家的誘惑》播出後，由於角色性格不討好，不少網民到其社交網留言攻擊，但她仍相當感激網民：「其實係感謝大家有去欣賞過呢個電視劇，留言係值得去細味。」
嘗盡人情冷暖
Rain憑一部《回》劇爆紅內地，之後一口氣拍了廿多部內地劇，除了贏盡人氣外，亦為她和家人帶來安穩生活，她說：「有啲人睇得比較表面，覺得做藝人梗係有錢就去賺，其實每個人都需要透過工作去維持生活，好慶幸我遇到嘅角色好有發揮機會。」對於拍劇為她帶來財富，更被指為圈中小富婆，Rain澄清：「我覺得呢三個字唔係發生喺我身上，永遠未到我。每個人嘅成功同穩定收入，都經過一番努力，但同時亦會經過一番低潮期，但往往冇人記得呢部分。朋友會記得我十幾年前要為家人孭債務，知我當時同家人承受好大壓力。好慶幸工作上遇到機會畀我去進步，就係呢個機緣巧合，加上自己嘅努力去獲得回報，我係感恩嘅。」
Rain坦言在娛樂圈亦經歷過低潮期，感受到人情冷暖：「相信每種行業都會有呢個狀況，試過成績未如理想時，連服裝阿姐都會睇唔起你。當你唔係女主角，甚至有人會視你如無物。」她表示拍《回》劇時，甚至想過完成後便結束其演藝事業，找個合適結婚對象出嫁便算：「諗住既然係咁，不如去展開人生另一頁，可以去結婚生仔，但點知套劇播出後好受歡迎，令我意會到好多嘢都係個天有安排。」
婚後想生兩個
工作發展順利，Rain與男友何遠恒感情亦見穩定，可謂事業愛情兩得意。至於婚期，她表示和男友都希望在這兩年內先把工作做得更好，慨嘆通貨膨脹，凡事都要為將來作出打算，她說：「小朋友讀書都需要龐大嘅資金，我喜歡小朋友，所以想生兩個。呢兩年工作都係想為之後嘅事作出最大努力，全部都係為小朋友着想。婚後生咗B，幕前都會繼續，自己仲有體力，唔好浪費。」
後記
Rain在圈中多年，經歷過人生的高低起跌，她呼籲年輕人別輕易放棄理想，又指踏入社會工作，不要單看人工和職位高低，要將眼光放遠一點。她以過來人身份說：「我以前都試過好低人工，但最重要係嘗試向目標出發，遇到挫折唔好咁易放棄。有時除咗實力，仲需要配合機遇，只要時機一到，好多事都會有改變。」
文：專案組
攝：劉智源
場地：蘭桂坊Jinjuu