洪卓立榮升電競隊老闆 容祖兒睇人打機同阿媽失散
天后容祖兒出席電競活動，自爆兒時經常流連商場睇人打機，曾試過太投入搞到與母親「失散」！而「機癡」洪卓立終打出頭來，榮升電競職業隊老闆。
容祖兒、洪卓立（Ken）、英皇集團主席楊受成博士、英皇集團企業行政主任楊政龍、英皇娛樂集團行政總裁許佩斯及英皇娛樂集團營運總監霍汶希（Mani）等人，昨日出席假apm舉行的「英皇電競」正式成立記者會，由黃心美擔任司儀，席上宣布「英雄聯盟」世界冠軍劉偉健（Toyz）加盟成為英皇電競的戰隊總監，並獲祖兒及Mani送上戰衣，而許佩斯則與多位嘉賓簽署合作協議。
玩到睇嘢冇焦點
祖兒受訪時承認曾沉迷手機遊戲：「我會畀錢買手機遊戲，試過打到差啲盲，要停止打機一星期。（打到有青光眼？）睇嘢冇焦點，又唔使睇醫生，抖一抖就得。」而問到小時候有否偷入機舖？祖兒直言沒有：「反而有去商場睇人打機，試過睇得太入神同媽咪失散咗。」對於謝霆鋒試過因打機而不洗澡，抵死的祖兒笑說：「佢打到腳趾甲伸晒出嚟同綑晒黑邊，講笑啫！」
女友習慣被忽略
而投資電競職業隊伍G-Rex的Ken自言是「小老闆」：「好開心公司肯畀我加入一齊玩，一直想成立一隊電競隊，之前遇人不淑，依家好似同屋企人（指英皇）做生意咁。」Ken自爆試過太投入打機而忽略女友湯怡：「打打吓機佢同我講嘢，當時我冇理佢，隔咗15分鐘我問佢係咪同我講過嘢。（佢嬲嬲豬？）少少啦，相信佢已經習慣。（有冇被詐型？）冇嘅，依家全公司藝人應該冇乜邊個可以Mark期打機，依家可以名正言順攞假打機啦。」
文：音樂組
攝：劉斌