湯洛雯索妹登場 世界Cup
藝人湯洛雯（靚湯）樣貌省鏡，原來其21歲胞妹Cass一樣索爆兼身材洶湧，目測巨胸達D Cup！最近靚湯上載兩姊妹合照，幫妹妹搭路做KOL。
湯洛雯近年事業發展順暢，拍攝資訊節目《學是學非》成功上位，在劇集《燦爛的外母》中擔正，形象討好，日前她上載一張與貌似苟芸慧的索女合照，原來是21歲胞妹湯樂瑤（Cass），翻查Cass的Instagram發現不少旅行相片，包括泳照及低胸Look，玲瓏浮凸，令網友驚為天人，讚她有世界級身材！
讀Law想做KOL
據知Cass之前在英國留學，今個學期返香港轉讀法律。靚湯受訪時，問到是否提攜胞妹加入娛樂圈？她指妹妹仍在求學階段，暫無意入行或選港姐：「以我了解佢想做KOL，佢畫畫好叻，對美容同時裝都好有興趣。」講到妹妹身材超勁，有網友比較兩姊妹的外形，靚湯笑說：「唔好話邊個靚啲，我哋完全唔同Style，佢細我九年，但完全唔似，佢比較成熟、女人味重啲，喺外國讀書，都唔介意着低胸衫，係健康性感！佢身材真係好，我都講笑話點解兩姊妹遺傳基因咁唔同！（妒忌？）咁又唔會，佢身材好，我都戥佢開心。（網友讚佢似苟芸慧喎！）我就唔覺得似，可能某啲角度問題，但話佢似苟姑娘咁靚女，梗係開心啦！」靚湯直言不介意姊妹拍住上工作：「我OK呀！呢排多咗人討論，妹妹都有啲怕醜，佢要做KOL，依家係好機會畀人認識吓。」
靚湯自認低B
靚湯又說兩姊妹感情要好，會跟妹妹分享心事：「我哋Friend到成日嗌交，但又好快冇事，佢好叻嗌完交扮冇嘢！哈哈！我哋成日傾心事，我偏向低B，佢偏向成熟，我喺工作、感情同着衫上有問題都會問佢，嚟緊佢會幫我做形象指導。」
文：影視組