楊洛婷心急撩老公追B
藝人楊洛婷與老公黃天翱（Tim）昨午帶同囡囡Tanya Faith Wong出院，兩夫婦向記者派朱古力分享初為父母的喜悅。因懷孕胖了不少的楊洛婷被問到會否想「追多個」，她即甜笑望着老公說：「想o架，下個月嚟啦？（湊成個『好』字？）好呀！」
她透露父母正從外國趕返港湊孫，又說：「嚟緊聖誕，我哋就會飛去探美加嘅親戚。」又爆女兒出生時，老公拍片時最緊張：「我叫佢快啲拍，我就拖住唔出力Push佢出嚟。」Tim指女兒生得合時：「咁啱內地演唱會批文遲咗，我拍緊套戲又早咗煞科，所以有時間等佢出世！」此外，Tim昨晨偕樂隊Dear Jane隊友Jackal參加在主題樂園舉辦的5公里賽跑活動，提到入產房剪臍帶，他笑言好刺激：「覺得好似剪牛雜咁，好煙韌，又腍腍哋，估唔到係咁嘅質地！」
