雷莊𠒇有男友Back up還火是但噏
喺網上搜尋器Search「雷莊」兩隻字，會顯示兩個結果，分別係「雷莊兒」同「雷莊𠒇」，更有人睇錯，以為係個「兜」字！多得出爐香港小姐冠軍雷莊𠒇，令大家知道「𠒇」、「兒」同「兜」嘅分別，不過好多人認為「𠒇兒兜」都係差唔多，使唔使咁認真先？
其實香港真係有好多差不多先生、小姐，直把「𠒇兒兜」當作同一個字，理論上冇咩問題，唔係Nuts哥吹水，雷莊𠒇本人已經闡述過，問到佢個名點解咁奇怪用「𠒇」字，佢就有咁嘅解釋：「其實我當年攞身份證嗰陣一直冇發覺，原來喺嗰刻已經寫錯咗！」以雷小姐嘅邏輯思維，「𠒇」同「兒」咪差唔多，唔使咁認真，叫「兜」字都仲得呀！
認住棚牙搵「阿哥」！
雷莊𠒇當選後，網友有驚天發現，發覺佢個樣竟然同祖籍烏拉圭嘅巴塞隆拿前鋒蘇亞雷斯撞樣，慘咯！芳齡23，雖然同球壇咬人慣犯生得似孖生兄妹，一般女仔都會因此喊濕枕頭，睇唔開仲可能會選擇去汀九橋做傻事，但係雷小姐來一招四両撥千斤：「唔會唔開心，都好好笑，唔會理會，對自己有信心！」其實蘇亞雷斯都有球迷讚佢靚仔，雷小姐都有棚哨牙，個樣咪差唔多，似蘇亞雷斯啫，網民使乜咁認真？
講開哨牙，有網民不留情面指名道姓話雷小姐醜樣，呢次佢就唔妥協喇，真係嬲嬲豬，喺自己地盤直播反擊！對於畀人話醜樣，佢一方面話：「I Don't Care！」另一方面就失去邏輯思維，叫畀負評嘅網友收口，只爭在未講粗口！過往港姐就算受盡負評，為保持形象都會選擇忍氣吞聲，點知雷小姐就顛覆港姐40幾年「百忍成金」嘅傳統，你鬧我咩？我一於十倍奉還，日前佢仲擺咗同男友張合照上社交網放閃，重申自己唔會被負評影響，仲話自己活得好開心，唔會改變自己，擺明刻意挑釁網民啦！
語出驚人先有Noise
雷小姐拉埋牙醫男友落水，力證佢棚牙冇問題，唔使箍牙，呢位「差不多小姐」為捍衞自己個樣，突然做咗「認真大隊長」認真起來。不過，佢嘅牙醫男友仲要深造多六年，吓，六年？即係學藝未精啦，雷小姐真係認真信牙醫仔男友呀？會唔會係男友仔驚你有「牙」，先至唔敢講事實真相咋？佢棚牙係咪信心保證？如果真係要認真，不如從善如流，搞搞佢好喎！
雷小姐牙尖嘴利，表面上失去理性同網友口誅筆伐，實則刻意營造惹火港姐形象，咁先有Noise！以前港姐講「美貌與智慧並重」，呢位90後就寧願「哨牙蘇與烈女」兼容，游走「差不多小姐」同「認真大隊長」之間，真係可以有你講冇人講，成為言論巨人KOL！靚唔靚好睇自己點睇，他朝雷小姐靠棚牙喺荷里活成功發展，你又「肯肯」定唔得？其實戴安娜同卡米拉個樣，夠係約定俗成兩種水平，邊個笑到最尾？大家心照啦！
Nuts哥