細細粒扯大纜碌地 人妻岑麗香封印戀愛史
藝人王祖藍、郭晉安及岑麗香等，昨日到中學宣傳新劇，並與學生玩扯大纜遊戲。香香學生時期已有裙下之臣，但笑言現時「嫁咗人」，不便多談！
無綫新劇《老表，畢業喇！》演員王祖藍、郭晉安及岑麗香等，昨日到葵盛區一間中學宣傳，眾人玩扯大纜遊戲，與學生打成一片。當中「細細粒」陳嘉佳及陳明恩赤腳上陣，細細粒更投入得玩到瞓地，王祖藍笑說：「你哋影唔影到條尿布呀？」細細粒聞言說：「老闆（王祖藍），你叫我訓練儀態，今日你搞到我出洋相喇！」
祖藍拍劇「神預測」
安仔與祖藍已是第三度合作《老表》系列，安仔說：「祖藍每次都發掘到我唔同嘅一面，今次以教育做主題都好貼近社會，自己作為父母都有特別留意。（對收視有信心？）祖藍每次預測都好準！連續三輯題材，我哋拍嘅時候覺得幾得意，一拍完咁啱個社會又會有呢方面嘅新聞發生，好切合套劇！」
教老公學中文
香香則表示：「呢套劇我係客串，亦係我婚前最後一套劇。（拍時趕住嫁，心情特別唔同？）想快啲拍完佢囉，有冇唔同就要觀眾留意喇！劇入面我飾演校花，行路時有風吹住，有花瓣飄咁樣，但我反而鍾意咗校長郭晉安。（讀書時都係校花，多人追？）我嗰陣比較怕醜，但都有少少嘅，唔好講啦，都嫁咗人喇！（會唔會畀老公強強睇呢套劇？）佢都好支持我嘅工作，我依家仲做咗佢嘅中文老師呀，真係估唔到！」
文：影視組