前港姐陳凱琳（Grace）昨日大騷香肩出席星夢郵輪活動，大談坐郵輪的感覺，並憧憬將來跟男友鄭嘉穎遠赴冰島結婚度蜜月，睇住北極光夠晒浪漫，笑言或會着白色羽絨婚紗！

藝人陳凱琳及方健儀昨日到紅磡出席星夢郵輪「世界夢號」首航倒數啟動禮，分享夢想及對郵輪的感覺，Grace與雲頂郵輪集團總裁朱福明、星夢郵輪總裁戴卓爾．布朗及雲頂郵輪集團市場部高級副總裁李鳳霞等主持啟動儀式。

Grace表示曾兩次登上郵輪旅行，感覺Relax：「一次去到阿拉斯加，好開心，可以亂咁玩，亂咁食雪糕！」活動上大會送贈郵輪贈券給Grace，問會否跟男友鄭嘉穎玩一次？她笑說：「睇吓有幾多張，如果得兩張，可能畀晒父母。（將來揀上郵輪度蜜月？）如果唔係香港出發都可以，想去遠啲，或者去歐洲，去冰島睇北極光，好寫意開心！」

是否去埋那邊結婚？她說：「驚着住啲裙會好凍！可能着白色羽絨婚紗。（有冇傾過去邊度蜜月？）諗咗旅行先，等大家拍完戲，不過到時又台慶又頒獎禮，可能要再遲啲。」

席上Grace呼籲市民參與拼砌全球最大的lego郵輪模型一同破紀錄，自己亦有參與砌了一部分，她直言喜歡設計，問將來會否設計愛巢？她說：「呢方面我成日變。（同嘉穎研究？）自己睇吓啲設計先。（買樓未？）我未有呢個能力，努力工作儲吓錢先。」

前新聞主播方健儀表示很喜歡玩郵輪上的設施，例如做Spa及做Gym，笑言最好是可完全投入假期，不用狂上網做低頭族，又表示老公是其最佳旅行夥伴，兩人都不沉迷購物，反而喜歡影風景，她又狂讚老公：「有時要等我化妝呀、出門口呀，佢都唔會投訴，佢真係好包容，唔會催我。我哋結咗婚七年，人生仲有漫漫長路。（有冇七年之癢？）身有啲痕因為敏感，個心就冇痕，佢係好好嘅心理輔導員，見到佢個樣好有治療作用。」

文：影視組