黎美言打不死愈賤愈強

傷胸骨呼吸困難

今年入行十周年的Winkie，2007年與張惠雅及張紋嘉成立女子組合HotCha，以清純、活力的形象打動少男歡心，後來組合於2014年解散，之後加入了名媛諸葛紫岐的娛樂公司，向樂壇及影壇進發。去年Winkie參加ViuTV的MMA真人騷《G1格鬥會》，拚命的演出，備受讚賞，更獲邀參演電影：「其實參加完《G1》之後，有諗過行武打路線，細個都好鍾意睇武打片，好鍾意楊紫瓊、成龍、李連杰等，打《G1》發現打拳好好玩，愛上咗，仲去考咗教練牌，去年4月開始收學生，教人打泰拳。《G1》帶畀我好多嘢，令到我有機會返內地拍戲，之前拍咗一部關於武打嘅網絡電影，第一次做女主角，之後又有好多試鏡嘅機會，之後都會向武打路線發展。」

凡事總有犧牲

Winkie主打泰拳，最近再攻巴西柔術，見她與教練對打時有板有眼，埋身搏鬥，又撻生魚咁撻，愈打愈起勁。問為何會想學巴西柔術？她說：「《G1》時係打MMA綜合格鬥，裏面主要有泰拳、有巴西柔術，而我最差係巴西柔術，當時學唔夠就去打，打輸咗，所以覺得喺邊度跌低就要喺邊度爬番起身，將自己唔好嘅嘢改善，依家會一路學上去，對我嚟講好難，但我遇強愈強，邊個位唔得就學番好。」雖然當時打到遍體鱗傷，有苦自己知，Winkie說：「最嚴重嗰次係傷到胸骨，當時連抖氣都辛苦，打第一場時，連吸氣都差啲吸唔到，嗰時喺屋企真係差啲崩潰，成身藥膏，自己一個人住，返到屋企仲要做家務，都會諗其實我咁辛苦為乜，對住鏡同自己講點解要咁樣作賤自己，但嗰一格好快就閃走，同自己講，你如果連咁嘅難關都過到，以後冇嘢難到你，將來面對所有事情都好容易解決，凡事總要有犧牲，睇得開就OK！」

黎美言考埋教練牌，有姿勢有實際。	黎美言希望向武打路線發展。	黎美言參加ViuTV的MMA真人騷，不留力對賽。

擇偶要揀正常人

當年18歲入行的Winkie，由一個不懂事的（口靚）妹，經過歲月的洗禮而成長，她說：「初入行係組合畀人形象可愛、好純真，依家獨立發展後，我畀人感覺都係好開心、好正面，其實我自從打咗拳後，對之前負面或攻擊我嘅新聞，都會正面面對，希望以後都保持正能量畀大家睇。雖然依家主力做演員，但我冇放棄做歌手嘅身份，今年入行十年，會出一張屬於自己嘅唱片，呢方面老闆都好支持，一路收緊歌，我對歌詞都好執着，所以一路改緊，希望有最新作品同大家見面。」

黎美言初出道時與張惠雅（左）及張紋嘉（中）組成HotCha。	經過歲月洗禮，黎美言洗脫稚氣，形象剛強。	黎美言呻之前唔夠打，現在卻一腳踢飛教練。

借歌講情史

講到歌路，Winkie說：「以快歌為主，我好鍾意快歌，但都會有慢歌，大家一直都冇聽過我講自己嘅愛情故事，入行以來都有拍過拖，有啲愛情感覺會放喺歌詞度。（依家有冇拍拖？）依家單身，但So Far拍過幾次都係長拖，對方都對我好好，就算唔夾，分手都可以保持聯絡。」Winkie揚言已到談婚論嫁的時候，但真命天子最終未出現：「唔知真命天子幾時有，但我對婚姻有憧憬，覺得自己對另一半會好好。（有咩條件？）正常，你知依家好多人唔正常，要愛錫家庭，同埋鍾意小動物，連寵物都照顧好，對人都應該會好好。」

組HotCha喊到爆血管

入行十周年，經歷不少苦與樂，Winkie表示最難忘是出道第二年就可以開演唱會：「雖然唔係好大型，但已經好有滿足感，入行時有好多代言、贊助，備受寵愛，之後諗埋咗一邊，覺得其實組合可以行到幾遠呢？好多唔開心嘅嘢，但又唔鍾意帶負能量畀人，成日收埋自己喺屋企喊，喊到眼微絲血管都爆裂，令到家人擔心，話唔係等我養，如果真係唔開心，就唔好做，陰暗期都持續咗兩三年，人同人相處最重要開心、要夾，都好多謝組合帶畀我嘅嘢。有唔開心對自己唔好嘅人，但我覺得如果唔係佢哋，我亦唔會變到咁堅強，打完比賽後，更唔會理負面新聞，朋友、家人、健康都重要，成個人走出陰霾，冇咩嘢可以令我傷心。」

問到是否之前與隊友不合拍？Winkie坦言：「組合開頭好夾，去到後期可能每個人都想做自己歌，例如我想做Hip Hop，你想做Rap歌，好睇大家夾唔夾，可以我讓步時，你又未必讓步，身邊有好多唔同聲音，如果唔堅定就好易被離間，組合分開都好唔捨得，但會支持祝福對方，始終曾經係戰友，但我唔會牽連太多是非，好似一對情侶就算分開都一定係雙方有問題，我唔會出嚟講太多嘢，只要努力去做，你嘅努力有目共睹。」

文：名人組

攝：劉智源