林子聰抱重磅囝囝慘變爸爸手

林子聰指囝囝好黐身，他一回家囝囝便攬到實一實。

藝人林子聰和Kay昨日在灣仔一間幼兒中心宣傳ViuTV節目《超級奶爸》，分別湊住21個月大的囝囝林奕滔和28個月大的囝囝何清義到場，兩個小朋友都可愛爆燈，似足樹熊抱實爹哋，最搞笑是明明林奕滔細過何清義幾個月，但望落就大對方成個碼，根本是子聰的翻版。

訪問時，子聰直言囝囝好重，所以抱到有「爸爸手」：「搞到由背脊扯到上頭頂，睇咗幾日醫生！」又指見得少，所以囝囝好黐身：「有時做嘢行開十幾廿日，一返嚟就會掹住我唔畀走，因為唔知幾耐先有得見。出咗門口只能靠視像通話見面，佢會錫個電話。依家出門口都要等佢瞓着先走得，如果唔係佢會指住梳化叫我Sit。」

啜爆手機螢幕

Kay亦指囝囝好黐身，但比較靜態：「都會錫個Mon，所以個Mon要好乾淨。行開咗真係好掛住，都不知幾難過，走開兩日已經喊出嚟。」子聰聞言即同對方鬥慘：「佢出世第一日我就飛喇！安頓咗老婆同見個仔一面就上機！」而擔任節目監製的Kay之後補充節目旨在教家長解決湊仔的棘手問題，例如如何對付小朋友食飯食個幾鐘：「所以拍嗰時都好緊張！」

林子聰早前帶囝囝到台北旅行。	何基佑的囝囝錫錫媽咪鍾凱瑩。	何基佑（左二）與林子聰各自抱囝囝，父愛滿瀉。

文：影視組