美國小天后Selena Gomez近年受紅斑狼瘡症困擾，一度停工休養，去年逐步回歸樂壇亦未見密密曝光，她昨日突然於社交網上載與好友瞓病床的合照，驚爆月前因紅斑狼瘡症而要接受對方捐腎，令粉絲大為震驚！
加拿大小天王Justin Bieber的25歲歌手前女友Selena Gomez前年自爆2013年患上紅斑狼瘡症，情況令人關注，她去年更一度疑因病引致抑鬱及焦慮，要停工接受戒療。雖然去年底已復工，但月前推出新歌與MV都未見積極宣傳，Selena昨日突然於社交網Instagram（ig）自爆因患紅斑狼瘡症而要換腎，獲好友捐腎救命！
Selena上載與29歲模特兒好友Francia Raisa着上病人衫瞓病床的照片，並撰長文表示知道粉絲關注她為何整個夏天都未見積極宣傳她引以為傲的新歌，她解釋：「我發現我因為紅斑狼瘡症而有需要換腎，已正康復中，呢件係我需要為我整體健康而做嘅事，我誠心希望同你哋分享呢幾個月發生嘅事，就好似平日想同大家分享一樣，我想公開多謝我嘅家人同無與倫比嘅醫療團隊，多謝佢哋為我手術前後做嘅所有事。最後，冇任何言語可以形容到我有幾感激我美麗嘅好友Francia Raisa，佢畀我一份終極嘅禮物，為我犧牲而捐腎畀我，我係深深受到祝福嘅，姊妹我好愛你！」Selena於文末指紅斑狼瘡症一直被外界誤解，亦不忘附上相關網址呼籲大眾關注此病。她更大方分享換腎後留下的長長疤痕，不少粉絲留言支持！
其實Selena近日分別出席多個活動，看似無恙的她驚爆換腎，嚇壞粉絲。她本周二精神奕奕地於紐約時裝周坐頭排睇代言品牌的時裝騷，似乎康復情況良好！Francia Raisa亦上載近照，精神飽滿。至於Selena的現任男友The Weeknd就未有陪伴睇騷，亦沒於ig放閃，僅見前日上載周潤發主演港產片《英雄本色》的經典場面，自言身處波士頓。
文：外娛組