卓楓而殺入樂壇唔怕負評
由模特兒變身社交網女神，再踩入樂壇的卓楓而早前推出首支個人單曲，自言不怕變負評王，因為有批評才有進步。對於被指與Angelababy撞樣，她希望向對方好好學習。
25歲的卓楓而（Candice）早前推出了第一首單曲《end of time》，反應不俗。因貌似Angelababy而備受關注的她，自覺不似對方，更笑言自己比較大眾臉，經常被指與其他藝人撞樣：「好在我似嘅人都係靚女，所以好開心、好榮幸，Angelababy好靚又有氣質，亦係好成功嘅藝人，我希望向佢學習。」
拍戲唔怕犧牲
對於被封為instagram（ig）女神，Candice坦言這個年代「女神」二字聽完就算，不會太認真，她亦有留意其他ig女神及新人，並逐一品評：「文青女神袁澧林笑起嚟好Sweet，我有睇佢拍ViuTV嘅作品；蘇麗珊演技好好，畀人感覺好清新。」問她會否擔心進軍樂壇會由女神變負評王﹖她認為有批評才有進步：「其實入得行都有心理準備，我一直有放好多心機去學唱歌。有人批評係好事，至少代表有人留意。」除了唱歌以外，Candice亦向電影界發展，問到其拍戲的底線？她坦言視劇本而定：「有好角色唔介意有少少犧牲，親熱鏡頭係在所難免。」
愛挑戰新事物的Candice，除了做模特兒與藝人外，她自爆讀書時代已投資六位數開設時裝店：「未夠18歲已經做模特兒，一直邊讀書邊做，當時想試吓做其他嘢，而且有個心願係開時裝店，所以將幾年來做模特兒賺到嘅錢攞嚟做生意。」時裝店開業一年多，她表示生意不俗，惟後來因難請人而結業：「有錢賺，但請人係個問題，員工流失率高，所以之後冇再做，但算係了咗我想開舖嘅心願。」
文：名人組
場地：Soho Spice