冼國林慳錢執導碌爆人情卡

冼國林絕對是人生「大冒險家」，由做財務生意跳入電影圈，再到內地「億億聲」搞影城，每件事都充滿挑戰性。早前他以60歲之齡執導勵志電影《我們的6E班》，單是度劇本已花一年時間。

不分你我他

問冼國林為何當導演？他笑說：「首先應該講吓點解我會拍呢套戲，係因為兩年前社會分裂得幾犀利，包括新移民、唔同族群等，但其實好多人都知共融一定係比排斥好，覺得應該拍番一部『不分你我他，香港是我家』為宗旨嘅電影。而呢套戲嘅收益亦會捐畀『社會共融發展基金』。」

冼國林拍攝勵志電影，帶出社會共融的訊息。	阮頌揚與陳欣妍在戲中有誤解，其後變成好友。	孫耀威有份客串。

由於電影作慈善用途，冼國林為了慳得一蚊得一蚊，最終決定自己做導演：「我哋用幾百萬拍呢套戲，出名嘅導演請唔起，咁不如自己做番。其實我之前都拍過五部微電影，反應都好好，依家編劇都有份做埋，慳得幾多就幾多。」冼國林起用旗下兩位新人阮頌揚和葉芷如擔任主角，表現令人眼前一亮，絕不像第一次拍戲，冼國林稱：「佢哋拍戲之前都上咗好多演藝堂，記得有一場落雨悲情戲，佢哋都做得好投入，阮頌揚演得好好，葉芷如直頭Cut咗機都仲喊緊。」

該片串星如雲，包括方力申、陸詩韻、馮素波、張慧儀及黃奕等，冼國林非常感激他們：「黃奕好夠朋友，特登喺上海飛嚟香港拍18個鐘，佢做後母呢個角色好有深度，睇到人心都實。至於波姐（馮素波）亦係非常之好戲，有一場嫲孫戲，我畀佢感動到差啲唔識嗌Cut，如果呢個角色多啲戲，絕對可以提名最佳女配角。」

朋友開支票包場

早前電影舉行試映場，反應極佳，冼國林笑言有老友即場寫支票包場，令他打下強心針，若票房理想，會考慮再一次執導：「不過係拍嘅話，一定唔會係商業電影，會係慈善電影，希望將一啲好嘅訊息向社會宣揚開去。」

文：影視組