惠英紅打戲頂唔順諗過罷拍
年屆57歲的惠英紅早前到馬來西亞拍攝英皇電影《Mrs K》，她坦言今次在炎熱的天氣下拍攝，因體力不及從前，曾想放棄，但因為欣賞導演及劇本，故頂硬上完成她的最後一部動作片。
影后惠英紅於本月上映的電影《Mrs K》飾演一名退隱江湖、到馬來西亞定居的竊匪首領，但因贓物不知所終，令她一家被追殺，最後與敵人展開激烈廝殺。正值夏天時分到當地取景兩個多月，小紅坦言體力消耗較大，原本一日的戲份要用兩日時間拍攝。
拒用替身
提到與馬來西亞影帝Faizal Hussein有不少對手戲，小紅難忘二人於繁忙時間在馬路上拍攝：「嗰場係偷拍，我跑出馬路時真係要自己（目及）住有冇車，我哋衝出馬路就跑。」她指Faizal是文戲演員，今次拍動作戲拍到嘔，她則於開拍前三個月跟三位教練操弗：「我體能上OK，最辛苦係跳落行人隧道，因為好高要吊威吔。上晒威吔再着自己衫，跑一段路先至跳落去。每次跳完我真係想放棄，真係冇晒力。」
入行至今拍了40多年動作電影，小紅早已宣布此片是最後一部動作電影：「其實係希望畀自己一個承諾，我啲骨頭都唔得，亦都唔想拍落去，用替身可能動作唔靚。」她表示與導演何宇恒已是第三次合作，早於六年前答應對方參演動作片：「當時啱啱拍完《武俠》，諗住52歲我都OK。但佢一直改劇本，我畀最後通牒佢，喺我踏入57歲就唔拍。主要係年紀大，信心跟住落，個膽又開始細。」
拍劇隨緣
小紅多年來未再拍劇，問到不再拍打戲後會否回巢無綫拍文戲？她說：「冇話想唔想，我一路冇話唔拍，可能佢哋冇適合劇本所以冇接觸我，又可能我冇咁平。」
文：影視組
攝：秦健輝
化妝：諺小白
造型：Queenie Yu
服裝：VERSACE
場地：如心銅鑼灣海景酒店39樓The Penthouse