霆鋒快閃做咕喱
昨日「型男廚神」謝霆鋒「秘閃」尖沙咀，戴上黑超Chok到爆的他，帶同台灣藝人徐熙娣（小S）驚喜現身旗下曲奇店，兩人放下巨星身段做「快閃咕喱」，落手落腳搬貨，為明天派送慈善月餅曲奇做準備。
霆鋒為慈善拉大隊返港拍攝新一輯「鋒味」，並專誠從台灣請來好友小S做嘉賓，昨日霆鋒進行首天拍攝，據悉因只有兩天時間拍攝，霆鋒和小S行程緊密，早上已走訪餐廳及健身室取景，到下午三時多，二人及拍攝大隊現身尖沙咀「鋒味曲奇」的Pop-up Store，不少霆鋒歌迷早已聞風而至等候偶像現身，霆鋒由保安護駕到場，小S則緊隨霆鋒身邊，現場Fans興奮尖叫。
搵歌迷幫手
身為曲奇店老闆的霆鋒，第一時間給小S品嘗招牌作「鋒味月曲奇」，小S咬下一口即說：「好好食。」並表現得對這新派月餅曲奇很感興趣。然而時間緊迫，霆鋒已急不及待將店內一箱箱的月餅曲奇搬走，但只得一雙手，他說：「邊度有咁多雙手，不如叫歌迷幫吓手啦？我哋要100盒月餅曲奇搬去做善事，但唔夠人手，可唔可以搵幾個幫手呀？」霆鋒此話一出，現場即有四、五名女歌迷撲出來相助。
之後霆鋒、小S聯同歌迷捧着一個大紙皮箱，將店內的存貨一箱不漏「清倉」搬走，霆鋒說：「依家要將啲月餅曲奇搬去深水埗明哥嗰邊，到時送畀啲低收入家庭。」
被逼埋死角
霆鋒捧着大紙皮箱入升降機，被歌迷逼埋死角仍保持四萬笑容。問到已久未在港現身公開活動？他說：「其實都唔算公開活動，主要係嚟搬貨。（中秋節係咪喺香港陪屋企人？）中秋呀，未知呀！」他稱因拍攝工作將會留港數天。之後，他將一箱箱月餅曲奇搬到車尾，為報答歌迷「出力」，上前與她們拍大合照。霆鋒由現身商場到離開前後只有十分鐘，為慈善由廚神變身做「快閃咕哩」。
文：音樂組
攝：吳文聰