林子善20萬鑽戒求婚 女友爆喊：點解咁大隻?
林子善在電台受訪時表示現時要努力搵錢預備擺酒，並自爆今年初在日本東京摩天輪下化身「阿拉丁燈神」，以20萬元鑽戒向女友求婚，對方即感動爆喊，並搞笑地問：「點解買咁大隻鑽石戒指？」
35歲的藝人林子善將於明年4月與拍拖多年的圈外未婚妻董佩欣（Kary）辦喜宴，子善昨日到電台受訪時，表示屆時會在將軍澳一間酒店筵開50席，更豪擲近百萬搞婚宴，他說：「所以依家要跑山（搵錢）囉！我同未婚妻講『你想點就點，幾多錢話我知！』，一生人一次想佢最鍾意，我個人冇所謂。」
馬爾代夫影婚照
談到求婚過程，他透露早於今年2月6日在日本東京摩天輪下求婚，更化身未婚妻最愛的動畫人物「阿拉丁燈神」，並將價值近20萬元的1.6卡D色鑽石戒指放在「神燈」中跪地，非常浪漫！他指求婚前有試探過未婚妻口風，可否將求婚戒指當作結婚戒指，對方表示接受，他笑言：「我扮去廁所換衫，喺橋上面扮派傳單，啲朋友叫佢去影相，諗住佢上去就跪地求婚，點知佢話等埋我先。見到我行落嚟跪喺度，佢喊到飛起，見到隻戒指問我點解買咁大隻，仲伸咗我兩腳！」
另外，子善透露與未婚妻將於10月初簽字，然後到馬爾代夫拍攝婚紗照，再去泰國旅行，因此現時要努力賺錢。最近他考了健身教練牌，不用拍劇時可以教健身：「我哋呢行三衰六旺好難講，自己鍾意咁不如考個牌啦！」
文、攝：音樂組