連詩雅負評中成長哭求包容

鄭融（右）感謝拍檔連詩雅的包容。

鄭融與連詩雅（Shiga）前晚在麥花臣場館舉行演唱會尾場，薛凱琪及關心妍等到場欣賞。Shiga透露《I'm Still Loving You》本來是她最後一首歌：「我出道嗰年嘅成績唔係咁理想，我好似一舊飯咁。當時抱住好真誠嘅態度錄音，好彩喺網上得到唔錯嘅成績，多謝有點擊嘅觀眾，令我有機會唱歌。」她感觸表示很多人只留意其娛樂新聞，自己看到網上不好的留言都會不開心，更哽咽說：「我都係一個人，都有瑕疵，有時做得唔夠好，點解大家一啲包容都唔可以有？」觀眾即大叫「加油」，Shiga稱每次聽到支持都會找到存在感：「慢慢我覺得唔緊要，呢啲經歷可以令我成長。」

鄭融自認蝦碌

騷後受訪時，鄭融表示很開心順利完成，笑言正按捺自己的情緒，會在沒有人的時候才哭，她感謝拍檔Shiga：「佢包容咗我好多嘢，我係蝦碌人。」Shiga則認為她們是互相包容，又自言不夠經驗：「阿融畀好多意見我，好多謝佢。（頭先忍唔住喊？）我每一次可以踏上舞台都會特別感動，諗起係咪好多人唔鍾意我呢？但我都仲有機會企喺舞台表演，應該好感恩，咁我就會好激動。（緋聞男友徐浩冇拎紙巾畀你？）係咩？可能佢忙緊。」鄭融表示打算向公司爭取二人唱合唱歌及到海外巡演，至於早前被直髮器燙傷腰部，她透露用了透明膠布及化妝品遮住結焦位置。

連詩雅提到網上負評時不禁爆喊。

連詩雅（左）和鄭融上演連場勁歌熱舞。

文：音樂組

攝：黎志輝