IFPI擸5獎做大贏家 祖兒超額完成預告年底「讓路」
天后容祖兒向來是音樂頒獎禮的「獎后」，昨日在《IFPI香港唱片銷量大獎2016》頒獎禮中合共橫掃5獎成大贏家！不過，祖兒以「冇新歌」為由事先張揚將缺席年底各大頒獎禮。
容祖兒、張敬軒、林峯、王灝兒（JW）、吳業坤及吳若希等歌手昨日齊集IFPI頒獎禮，其中祖兒個人奪得「十大銷量廣東唱片」、「十大銷量國語唱片」、「全年最高銷量本地女歌手」及「十大銷量本地歌手」，加上與李克勤一同奪得「最暢銷本地現場錄製音像出品」及「全年最高銷量本地現場錄製音像出品」獎，合共贏得5個大獎，聯同英皇旗下歌手張敬軒、林峯、Twins及李克勤等共贏得16個獎項。
未有「婚」數：唔係Must嘅
雖然獲得好成績，但祖兒竟一早睇淡年底的攞獎機會，她說：「其實我今年冇出歌，一首歌都冇，就算出席都係純粹支持。（預早講定唔去？）早啲講定嘛！唔係一陣你哋（記者）又問。（唔去咪好多獎項斷纜？）首先唔覺得連任係必定做嘅事，亦唔係一個健康現象，如果樂壇有更好、更值得攞獎嘅歌手，佢哋得到獎我都好開心。對我嚟講，我已經超額完成咗一生要做嘅嘢，我都隨遇而安去面對工作。」問到是否下一步計劃結婚？祖兒即說：「諗吓先啦！呢啲嘢又唔係Must嘅！你哋提議嘅嘢，要慢慢諗清楚要思索吓。」早前祖兒與蔡卓妍（阿Sa）到杜拜旅行，講到對方的新戀情，祖兒指阿Sa容光煥發，又向男友視像「報到」。
又做賤男？吳業坤認要檢討
另一贏家吳業坤近月忙於深圳拍劇，昨日專誠返港領獎。對於與鄭俊弘同奪4獎打成平手，坤坤大感驚訝，開心得汗流滿臉！不過，當提到藝人陳潔玲早前稱在無綫拍劇時遇過賤男藝人，事後坤坤「躺着中槍」成為嫌疑人物，他感激森美在電台節目中幫他澄清：「不過自己都要檢討下，點解千萬個男藝人，大家會估係我？」
至於奪3獎的林峯被問到女友千語投訴一年只得五分一時間相見？他說：「咁佢有時都過嚟住嘅！（過夜？）咁男女朋友都好正常啫！」此外，歌手黎瑞恩、石詠莉及已故的張國榮等均獲頒「十大銷量廣東唱片」。
文：音樂組
攝：秦健輝