朱智賢PuppyLove撞見老師驚篤爆！

Ashley抵達輕鐵站後，熟悉地拍卡入站，她自言中學時期常以輕鐵代步：「輕鐵畀我好多回憶，由細到大喺屯門長大，輕鐵喺市區冇，嗰時返學放學都係搭佢，好有代表性，原來唔係所有香港人都搭過，我覺得好得意！」

輕鐵常客遭搭訕

Ashley坦言加入娛樂圈後，多了乘客向她搭訕：「入行後，啲人會望吓我，覺得好熟面口，會走埋嚟傾吓偈，同我講：『好鍾意睇你節目』、『我都成日支持你』，搭搭吓又試過有人喺社交網私訊我Say Hi，話見到我；我就比較驚、又怕醜，唔敢去搵嗰個人，好尷尬！」

海濱長廊拖手仔

之後Ashley興奮地走到海濱長廊，原來這一條長長的道路是她發生初戀的地方，重遊舊地，頓時令她回憶湧現：「係人生一個重要回憶，當時讀緊中學，14、15歲，係人生第一次初戀，喺度拖手仔，亦係第一次拖男仔手！」

浪漫蝴蝶灣 朱智賢行沙灘拍拖、嬉戲，留下不少美好回憶。	輕鐵站 朱智賢入站搭輕鐵十分熟路。	來到燒烤場，Ashley諗起與同學一齊BBQ的樂事。

Ashley笑言當然是男方採取主動：「梗係佢主動，唔係我主動啦！嗰時好緊張好怕醜，放學成日都喺度拍吓拖仔，試過拖手漫步時，撞到學校個老師，佢翹埋雙手睥住我哋兩個，嚇到我哋即刻鬆手扮冇事，驚佢返學校鬧我哋，好彩佢冇通知家長，都好驚屋企人知！」可惜這段共過「患難」的戀情只維持了幾個月便無疾而終。

Ashley外冷內熱，其實好易相處。	拍拖勝地 朱智賢就是在這條海濱長廊譜出初戀。	朱智賢常搭輕鐵，喜獲乘客向她打氣。

沿住長廊一直走，便來到蝴蝶灣沙灘，Ashley透露曾跟初戀男友在沙灘浪漫踱步，但更多時候是跟一班女同學流連在此，她笑說：「返學辛苦完一日，我哋嚟到呢度好放鬆，除晒鞋除晒襪，通沙灘跑！」

少女心事沙灘藏秘

Ashley還自爆當年做了一件很浪漫的事：「我哋將啲秘密、心事寫落張紙度，挖個窿埋咗佢，嗰時好天真諗住一年後返嚟可以挖得番張紙，其實啲沙不斷移動，係搵唔番o架，哈哈。」當年青春無敵，連救生員哥哥也會刻意走近她們搭訕，Ashley說：「佢哋會口痕過嚟傾吓偈，見我哋成班學生妹嘛！」

最後，Ashley來到燒烤場，她表示中學時期每逢過時過節，都會跟朋友仔約埋燒烤慶祝：「成班朋友中秋節就會喺度燒嘢食，過時過節呢度好墟冚，中秋節全場爆滿o架！好似飲茶咁等位，你等兩個鐘，我等兩個鐘咁，夜晚等到有爐就開始，依家啲燒烤場包嘢食，我哋以前會一齊去買嘢過嚟，同依家啲燒烤場好唔同，以前有樂趣好多！」

後記：爽朗傻大姐

Ashley不說話的時候，給人冷艷的感覺，但只要她開口說話，就會配搭爽朗的笑聲，愛笑的她其實是傻大姐一名，而且不怕辛苦，就算要在炎夏走訪多個地方，熱到身水身汗亦毫無怨言，而且會盡力配合，工作態度和爽朗個性皆滿分！

文：李惠儀

攝：劉斌