出爐雙料港姐冠軍雷莊𠒇一當選即引來大批網友狂踩唔夠靚，指她牙齒似足烏拉圭國腳「哨牙蘇」蘇亞雷斯！自信爆棚的雷莊𠒇昨日作出反擊：「佢哋話我好醜樣，I Don't Care！」並指不會改變自己而箍牙，又自爆母親跟投她兩票的星級評判鄭裕玲都叫「嘟嘟」，相當有緣！

《2017香港小姐競選》前晚圓滿結束，現年23歲的雷莊𠒇（Juliette）打破試戴后冠魔咒，最終贏得冠軍兼最上鏡小姐，反而賽前大熱何依婷只得亞軍，伍樂怡更捧蛋，賽果引起網友熱議，有人質疑賽制，大批網友更狂踩Juliette的樣貌，指其牙齒相當「突出」，似足有「哨牙蘇」之稱的烏拉圭前鋒蘇亞雷斯！

雖然被網友狂轟，但Juliette心情未受影響，昨日在社交平台玩直播，用英語逐點反擊負評，起初她表示尊重大家不同聲音，其後愈講愈惹火：「不過講真，我唔係好Care，一個人要愛自己，我好知道自己價值喺邊！首先要多謝撐我嘅人，不過我真係覺得挑起罵戰嘅人好Sad，對佢哋好失望……佢哋話我好醜樣，I Don't Care！佢哋淨係睇到我個樣，唔知我個人係點……你哋可以繼續講你哋想講嘅嘢，不過我唔識睇中文，我係唔會浪費時間去翻譯……唔滿意呢個賽果嘅人，唔通想我放棄后冠？唔會咁做囉……我會繼續做自己，唔會改變去討好其他人！」

昨日Juliette會見傳媒，對於父親被起底，她指爸爸不介意：「佢係個好開心嘅人，人人都有自己意見，唔可以取悅晒所有人，爹哋媽咪專程由東莞返嚟支持我，爹哋話我跳舞好好同估唔到我唱歌劇可以唱到咁高音。（佢送嘢畀你？）冇，我都冇要求，爹哋好驕傲，有我呢個女已經好感動。（再同屋企人食飯？）佢哋返咗東莞，遲啲啦！食爹哋煮嘅咖喱！」

對於負評如潮，Juliette表示中文不好冇留意，而被指似蘇亞雷斯，她說：「唔會唔開心，好好笑，唔會理，對自己有信心！（入行會箍牙？）冇諗過，我覺得我笑得好燦爛，我夢想入荷里活，想拍超級英雄電影，外國人唔介意，自己好驚做手術，所以唔會啦！」提到與鍾鎮濤女兒鍾嘉晴是朋友，對參選是否有幫助？她說：「唔會，朋友還朋友。（有冇透過鍾鎮濤認識陳百祥？）我（之前）冇同陳百祥見過面。」

對於網民質疑賽制兒戲，Juliette指評判專業，又自爆母親跟星級評判鄭裕玲一樣叫「嘟嘟」，故分外親切：「我喺台上有個錯覺點解阿媽坐咗喺台下。（鄭裕玲知？）唔知，未有時間傾過。」Juliette出席完活動後，獲大會安排車輛送返酒店，落車時她一袋二袋狀甚狼狽。

此外，前晚完騷後Juliette受訪解開名字(𠒇)字之謎：「我當年攞身份證嗰陣一直冇發覺，原來嗰刻已經寫錯咗，到我參選，我仲問大會做乜寫錯我個名，佢哋話係跟住我身份證咁寫，我先發覺寫錯咗，遲啲會去改番做『兒』！」她返回下榻的炮台山某酒店，未見家人迎接，笑言最想食炸雞慶祝。另外，通訊事務管理局昨日收到20宗有關港姐的投訴，主要投訴賽果不公。

文：影視組

攝：追蹤組