苟芸慧自從宣布封盤，與賽車手陸漢洋拍拖後，感情一日千里，更屢傳出婚訊，雖然雙方均稱未有結婚計劃，但其實九月中，陸漢洋會陪女友到意大利米蘭睇騷，並計劃轉去威尼斯訂婚，給女友一個名分。昨午他陪苟姑娘試衫，見女方挑選一件由頸遮到落腳的連身裙，看來她怕男友呷醋，不敢性感示人！

苟芸慧（苟苟）與陸漢洋公開戀情後，男方愛的攻勢一浪接一浪，今年「520告白日」於社交網公開示愛，寫上「52099」（我愛你苟苟）！繼而將家傳之寶、母親生前所戴的鑽戒贈予女友作定情信物。之後兩人不時出雙入對，無論出席活動或陸漢洋參加賽車，苟苟必定陪同左右，甜蜜到爆。

苟苟性格溫柔體貼，深得陸漢洋愛錫。自從收身變瘦回復靚靚後，工作亦愈來愈忙。九月中，苟苟獲邀到意大利睇騷，陸漢洋亦會陪同出發。昨午她隨經理人和助手現身九龍塘一餐廳午膳，陸漢洋突然現身，原來為了爭取見面機會，幾忙都抽時間來陪女友。

眾人食飽後，陸漢洋再陪苟苟到Sportmax試衫。抵達店舖後，他即匆匆離開，原來為氹女友，專程行到商場另一端買雞蛋仔，見他買完已忍不住邊行邊食，折返店內即坐在梳化上繼續食。而苟苟則不停進出更衣室，每試完一個造型，便走到男友面前問意見。見她揀了一件黑色連身裙，幾乎由頸遮到落腳，將其美好身段「封印」，看來她擔心男友呷醋，不會隨便性感示人。

據知，苟苟一向鍾情威尼斯，覺得當地很浪漫，經常向男友提及。雖然陸漢洋平日冇厘正經，但其實記得女友所講過的每一句話。今次意國之旅，他已秘密安排最頂級的酒店和餐廳，準備給女友一個既驚喜又浪漫的求婚及訂婚儀式。

問陸漢洋是否準備在意國訂婚？他說：「佢（苟苟）過去意大利做嘢，我自己去比利時賽車，不過到時會Join埋。（咁靚嘅地方適合求婚同訂婚！）好提議！」問到是否訂婚？他即保持神秘說：「唔答、唔答、唔答！（婚期呢？）諗緊，度緊期，兩個都要度，我大概知自己賽車時間表，但佢嘅時間要同佢經理人度，佢經理人有好多工作安排。（係咪要攞埋法國賽車冠軍先結婚？）贏唔贏到都會結婚，但真係要講Timing，結婚都要搵啱地點。佢家人喺加拿大或者香港，我又有個好想去嘅地方，都幾頭痛，問緊身邊啲朋友取經。（出年結？）希望啦！」

文：名人組